陳展鵬唔妥洪永城：佢溝到筍盤

藝人洪永城、陳展鵬、陳山聰及陳凱琳等昨日現身長洲，宣傳無綫台慶劇《張保仔》，被指不和的Tony及展鵬全程甚少交流，剛抵長洲時Tony主動搭展鵬膊頭示好拍大合照，但之後就行到離行離列，更不時背對背，展鵬被同劇演員捉實玩自拍時，Tony更索性轉身當見唔到！展鵬、Tony及陳山聰舞獅助興，展鵬及Tony明顯「姐手姐腳」，只有學過醒獅的陳山聰表現得有板有眼。

心病太多

Tony與展鵬受訪時分別笑笑口談論不和傳聞，但抵達酒樓午膳時就分枱坐。展鵬笑指二人拍劇時已不和及有積怨，被問是否看不過眼Tony上位快？他說：「唔係唔抵得，其實佢拍劇part得最多係我，我係唔抵得佢咁快學晒我啲嘢做男主角！」笑言與Tony有心病的展鵬更謂：「多到數唔晒！（最嬲係咩？）咪一入嚟識咗個女朋友！（唐）詩詠咁筍咁都被佢溝到，我入嚟咁多年，女仔手都未拖過呀！真係男人最痛，我都要檢討吓！」他又否認曾鬧Tony當片場是遊樂場，大讚對方工作認真。

陳展鵬被同劇演員捉實玩自拍，洪永城擰轉身冇眼睇。	洪永城曾一度搭陳展鵬膊頭示好。	（左起）：楊明、洪永城、陳展鵬、陳山聰 洪永城與陳展鵬舞獅不及陳山聰似模似樣。

嗌交認輸

Tony聞悉展鵬的回應後，即低頭哈哈大笑，他表示在展鵬身上學識不少拍攝技巧，指若沒有對方教他亦不會進步快速。至於是否「踩住」對方上位，他說：「你講得咁難聽！我唔會答你o架！」但就感謝TVB給予不少機會，被指上位快的Tony續說：「唔係，加入無綫三年啦，今次角色係公司同上天畀嘅機會。」

至於有否與展鵬吵架，Tony說：「有討論，但冇嗌過交，因為佢一定拗贏。（私下有冇聯絡？）間中有WhatsApp，之前有一齊睇戲。」談及展鵬未有女友，Tony謂不相信，更爆料指一、兩年前曾介紹女仔給他認識：「可能佢享受一個人生活，希望有個好女人，好好接受同包容佢呢個人。」

文：影視組