6個是非精擔心嫁唔出
無綫小花黃心穎、李佳芯（Ali）、梁嘉琪、張秀文（Sammi）、湯洛雯（Roxanne）及麥美恩（Mayanne）因合作資訊節目《學是學非》變成好姊妹，六個女人何止兩個墟，每逢她們同場，全場分貝必定激增！這次她們暢談拍攝趣事、對運動男的幻想及姊妹情，更表示怕做完節目後六個都嫁唔出！繼續笑聲喧嘩嘈到拆天！
李：李佳芯、梁：梁嘉琪、黃：黃心穎、張：張秀文、湯：湯洛雯、麥：麥美恩
上陣搵命博 Ali學游水險浸親
梁：《學是學非》已經嚟到第三輯喇，今輯主要玩運動，嘉賓除咗係藝員，仲有真嘅運動員，乒乓波有李靜，足球有山度士，游水有司徒瑞祈、方力申等等。
麥：啲運動員都係靚仔嚟，不過我哋有唔少蝦碌嘢喎！
湯：Ali幾乎浸親呀！
李：唔係幾乎喇！我哋去咗2.4米深標準泳池，要學自由式，跳落水先發覺掂唔到底，好驚！
梁：呢輯我哋係有性命危險架，我同Sammi唔識游水，都要喺水中瀡滑梯！
湯：你上水之後喊咗出嚟，大家都好擔心你。
李：好多看似小朋友嘅簡單嘢，我哋做原來好驚！
麥：運動員體質係心穎比較好啲，佢最叻踢波同埋……踢波。
黃：得一樣囉，哈哈！我哋六個運動細胞都麻麻。
湯：我玩乒乓波就學咗好多假動作。
麥：我就學到荒島求生技能，有個環節叫「魯賓穎飄流記」，要學自己生火、用竹筒煮飯、整木筏、紮吊床！係以故事形式包裝，我扮男人，嘉琪就……
梁：都係扮男人。
張：哈！你哋介紹得好差呀，Mayanne係聰明笨伯、嘉琪就扮黃藥師嘛！
黃：魯賓穎就係我，日日暴曬，皮膚極速由白變黑。
麥：我哋扮男人係自己搞造型，學埋易容呀！呢樣都係求生技能嚟架！
數健將優點 張秀文驚水見人攬
麥：今次節目主題係講運動，我都好鍾意運動型男仔架！
梁：因為畀你打都受力啲？
張：冇咁易死，哈哈！
麥：我最鍾意游水嗰啲，菲比斯（美國游泳健將）咁！鍾意大隻，唔一定好多肌肉，但要夠結實！
湯：我就冇乜呢啲幻想，唔好弱過我囉！運動男通常身形好、身手敏捷啲，自然係吸引，但我睇內在多啲嘅！
李：我鍾意運動男仔係因為佢哋夠健康，唔關外形事，係證明佢對自己有自制能力、自律，我細個鍾意籃球員，大咗就睇足球，我唔睇靚仔架！有一排好迷奧雲，佢又唔算好靚仔。
張：咁都唔靚仔？你好難捉摸呀！
李：我又會欣賞沙治奧拉莫斯（西班牙球星）呢類，佢都唔係sell靚仔，我鍾意技巧型！
梁：我覺得認真男仔係好吸引，啲運動員專注打波好加分，好似李靜（香港乒乓球運動員）咩時候都好專注，食飯都係咁嘅樣。
湯：但佢同我哋拍得好開心，都有溶化咗佢少少。
張：係互溶呀，梁嘉琪都溶晒，同佢合照嗰陣勁面紅。
黃：我細個鍾意睇冰上曲棍球同籃球，識運動嘅人感覺好陽光同毅力好啲，我比較鍾意粗獷型架，好多欣賞嘅運動員都係鬚根王！
張：我就要求好簡單，識游水就得，因為我一跳落水就好驚，見人就攬！
李：想追Sammi就可以帶佢去游水喇，英雄救美！
張：我試過呀！跌落水試過有人救，但一上水見到對方，就覺得唔對路，即刻推開佢，哈哈！
笑罵姊妹情 約定互做子女奶媽
李：我哋由第一輯開始，每次有人生日都會齊人切蛋糕，好多謝幕後同事貼心安排。
黃：有時其他人知我要拍劇，都好樂意頂我個更，好窩心！
梁：試過有次我好病失晒聲，大家都肯做埋我嗰份。
湯：我哋都覺得幫人頂工作冇所謂，Mayanne成日幫我哋頂配音，因為佢住得近。
黃：有時Roxanne見到有防曬用品減價，就會喺個group度分享，佢買好多嘢畀我哋！
湯：因為呢排佢哋曬到好黑，大家都好sad咁。
梁：仲有最齊心係買早餐，大家好踴躍輪住買，冇人覺得蝕底。
麥：我最感激係嘉琪媽媽啲湯，因為佢哋知我一個人住冇湯水，同埋大家調節咗我好多，我依家識得點控制笑聲同聲量。
（其餘五人：仲係好大聲囉，仲有要控制打人嘅力度！）
張：我比較後加入，但好快就好enjoy，不過原來大家覺得我好嘈！
李：Sammi係好多嘢講，愈來愈大聲，Mayanne一嚟就超大聲！
（其後話題一轉，問到覺得六人中誰最快嫁得出，大家即齊心指向嘉琪！）
梁：我年紀差唔多啫，但我未必會咁快！
湯：我好驚因為呢個節目，六個都嫁唔出呀！
（其餘五人：啋過你呀！）
梁：Roxanne似唔聲唔聲結婚嗰啲！
麥：我哋如果第時生仔女，另外五個可以做奶媽呀、契媽呀！
（其餘五人：邊個係奶媽呀？哈哈！）
湯：諗到第時我哋生啲女又係咁嘈，我一定會將佢隔離，呢幾個Auntie係反面教材！
黃：其實我最想知第時Mayanne個老公係咩人！
梁：係咩人會鍾意佢！
麥：有架，你哋唔知咋嘛！
湯：我覺得心穎會早結婚，佢好鍾意家庭同小朋友。
黃：係咩？我唔知呀！你問下我肚入面嗰個先！（接着cute爆扮ＢＢ聲）
（其餘五人：好嘢！依家宣布心穎第一個有ＢＢ！有五個契媽！）
後記
六位是非精好像有用不完的體力，拍照時非常投入，鬼主意多多鬥擺搞笑甫士，到坐低傾偈時更是笑聲拆天，你一言我一語，大聲講大聲笑，比隔籬房排舞的音樂更大聲，「殺傷力」驚人！
筆錄：立影
攝影：劉斌