李玟PlanB決定雪卵
歌手李玟與老公Bruce結婚近四年，一直希望有小朋友，但兩人均是大忙人，今年工作已排滿，生B計劃要等下年，而為求自然生育，故不會考慮試管嬰兒，但已計劃明年雪藏卵子。
李玟（CoCo）與老公Bruce、甄子丹太太汪詩詩、名媛薛芷倫、名模Amanda S.、周汶錡與老公Julien、邱子傑夫婦、趙式慶夫婦等昨晚出席慈善餐舞會，CoCo被問到老公是否非常黐身？她說：「都唔係，因為佢成日周圍飛，我又要飛去內地工作，所以可以一齊就一齊。」她透露將參與內地的音樂節目，並大讚好看，更有興趣參與《我是歌手》。她又謂現正忙於籌備推出發燒碟，她的兩個姐姐都會唱：「畀大家聽吓我哋三姊妹嘅歌聲。」問到Bruce會否合唱？Bruce則自嘲五音不全。
講緣分逼唔嚟
問CoCo如此繁忙，會否沒時間生小孩？她說：「有嘅，不過緣分呢啲好難講，逼唔到，以平常心，會繼續做自己嘅工作，如果有係好事。（會唔會雪卵？）好，可能下年。（已經排咗期？）唔係，今年好忙，下年先。（試試管嬰兒？）應該唔會，想自然，如果上天覺得我應該做媽咪，就會畀機會我。（放假可以多啲時間造人？）我嘅事業同做太太係平衡嘅，我又想做好太太，又想做好工作，要取捨。」
詩詩收花冧爆
而汪詩詩提到上月尾結婚12周年，因子丹在英國工作而未能一齊慶祝，但正日老公越洋送花，令她冧爆。問到胞妹汪圓圓現在懷孕幾多個月？她說：「應該過咗講得嘅時間（三個月），應該出年先生得。」而薛芷倫則透露下月將於中環開新餐廳，並與歐洲著名品牌合作，把尊貴品味及美食融合，但不願透露投資金額。
文：名人組