SG餐餐計數：有咩拎出嚟傾
組合Super Girls被最新一期《好報》拍到為8元飯錢反面，成員Heidi昨日自爆姊妹間曾試過因意見分歧搞到鬧交，最後要攤開「講數」修補姊妹情，而隊長Aka承認姊妹每次開餐都是AA制，並澄清五女沒有「心病」。
昨日出版的《好報》影到Super Girls（SG）早前出席完活動到附近茶餐廳醫肚，享受美食時眾姊妹有講有笑，直到埋單時發現有隊員畀少錢，眾女為8元在食店門口鬧足十分鐘，最後要隊長Aka「硬食」，之後五女嬲爆爆行去搭港鐵，全程零交流各自各做低頭族喪撳電話。
慳錢學舞
Heidi、Aka及Yanny昨日分別為「八蚊雞之戰」解畫，Yanny說：「一定唔會為幾蚊嘈，我哋成日互相請對方食嘢，唔會不和。」無端端畀多8元的Aka說：「我哋唔係為八蚊嘈，其實我哋每次食咩都會除番開，始終組合會慳啲，因要學跳舞同唱歌。」而Heidi則說：「我哋有試過嘈交，不過好快冇事，一見到面忍唔住傾番偈，冇乜心病，大家講好咗有咩都會拎出嚟傾。」
排隊刷牙
另外，SG早前拍攝新歌《一拍即愛》MV，五女輪住咬同一個道具蘋果，由於蘋果塗上油漆，搞到五女的潔白牙齒沾滿油漆，要排隊輪住刷牙，抵死的Aka笑說：「會唔會中毒o架？」
文：音樂組