積登拖新歡狂咀向Kylie示威

美國影星韋史密夫(Will Smith)的17歲愛子積登(Jaden)前日拖21歲模特兒新女友Sarah Snyder於紐約時裝周睇騷晒姊弟戀,向同場睇騷的前緋聞女友Kylie Jenner示威之餘,更即場攬咀,咀到場外變激情熱吻上演「真人騷」搶盡風頭!

言行出位的積登,早年與美國真人騷女星Kim Kardashian同母異父妹妹Kylie傳緋聞,做足幾年觀音兵跟出跟入,情變後更一度被傳是同志。近日Kylie與男歌手Tyga公開打得火熱,積登前日即高調拖模特兒Sarah現身紐約時裝周睇Gypsy Sport騷,似向同日睇Vera Wang時裝騷的Kylie示威。

街頭激情舌吻

積登帶女友坐頭排,更公然攬頭攬頸又情深咀嘴,即場上演「真人騷」搶晒時裝騷焦點,兩人的慾火由場內燒到場外,其後小情侶於街頭又挨又攬之外,更一度激情舌吻,積登被拍到狼死伸脷,忘形到暈,完全陶醉在溫柔鄉中。至於近期被指有心扮Kim博上位的Kylie就罕有以密實服飾睇騷,不用賣肉外,更與設計師Vera Wang咀面合照,成功升呢,難怪對積登的示威完全無反應。

Kanye封口令

另外,Kylie又與同母異父哥哥Rob的歌手舊愛Rita Ora同場睇騷,兩女似足世仇零互動,一身全黑透視裝透出內衣與驕人曲線的Rita風騷任影成焦點。此外,有傳Kim老公Kanye West近日要求於時裝周行騷的模特兒簽下協議,承諾不會講他與Kim一家的是非,否則會被控索償1000萬美元(約7800萬港元)。至於男歌手Drake前日亦現身撐女友兼網球手S威廉絲(Serena Williams)的時裝騷,被拍到於後台錫錫女友小手,而百變天后Lady GaGa大前日亦真空上陣睇Brandon Maxwell騷。

文:外娛組