張繼聰乘勢開騷唔受老婆玩
多得新劇帶挈，張繼聰重拾歌手身份於12月舉行紀念入行卅年兼加入樂壇十周年演唱會。阿聰坦言入行卅年最大得着是娶到好老婆謝安琪（Kay），身為愛妻號的他為免Kay辛苦，演唱會不會請老婆上台，但會邀請劇集拍檔捧場，到時墟冚場面分分鐘似台慶！
張繼聰擔演的無綫劇集《收規華》正熱播，飾演「金華」的他大受歡迎，主辦單位即食住個勢，投資七位數在12月12日為阿聰在九展舉行一場名為「I'm OK」的演唱會。演唱會對阿聰有雙重意義，童星出身的他今年入行卅年，又是加入樂壇第十年，對演唱會十分着緊的他除了自訂所有構思，連幕後都兼顧埋。
冇樣都可以圓夢想
開騷是否因劇集帶挈？剛自多倫多和高海寧等藝人登台返港的阿聰昨日在電話中多謝劇集提升人氣，但他不會驕傲：「有人鍾意亦有人批評，有人話我唔靚仔，唔好繼續做（娛樂圈）啦，批評我接受到，所以想透過個騷，話畀大家知就算冇背景、冇樣都可以達到夢想！（會唔會請老婆阿Kay做嘉賓？）唔好啦，我怕醜(口架)，我哋兩公婆成日喺街畀記者影到，上台就真係唔好，今次都係想同太太分享個演唱會，如果做嘉賓佢又要化妝、整頭、記歌詞，好辛苦，我想佢可以輕鬆睇騷。」
嘉賓方面阿聰大賣關子，曾跟王祖藍、王菀之、黃翠如、楊怡等人合作拍劇的他只肯透露：「我會請所有合作過拍劇嘅拍檔嚟捧場。（到時咪好似台慶咁熱鬧？）千祈唔好咁講。（會唔會騷肌？）唔會啦，要睇肌肉都唔係睇我。」
最大得着娶好老婆
入行卅年，阿聰說最大得着是娶到個好老婆：「我都覺得自己好幸運，雖然人嘅欲望無限，但我都已經好滿足現狀，因為我有個好家庭、好老婆、身體又好好。（仲有咩要求？）事業上，對獎就冇要求，但又唔會清高到有人畀獎我我唔要扔落地嘅，不過攞獎要視乎天時地利人和。」近年他專注拍劇，歌唱事業似乎放緩，阿聰說對唱歌依然好有熱誠，希望透過演唱會可以讓人認識到他的音樂！
文：音樂組