袁詠儀紅乳警告 平板胸進化
袁詠儀（靚靚）密實25年，終於破天荒來個「人妻大解放」，她瞞住老公張智霖響起紅色暴「乳」警告，穿上火紅超級Deep V中門大開出席活動，勁晒激罕八字胸。雖然靚靚今次出盡奶力，成功挑戰性感底線，由昔日「iPad Mini」身形突然進化成巨型版「iPad Pro」，隨即惹起隆胸疑雲，不過靚靚堅稱是純天然靚胸，拒靠僭建死谷事業線！而張智霖對靚靚的性感回應竟是「……」。
袁詠儀出道25年以來，打扮一直密實過密實袋，封胸多年的她終於使出一招「還原靚靚球」，昨日出席珠寶店開幕活動時，來個終極性感大解放。穿上火紅色大Deep V裝的靚靚真空上陣，大晒八字胸，甫出場已引來一陣哄動，表現怕醜的她尷尬地笑。當靚靚烏身倒奶剪綵時，再驚現湯碗形巨乳，同場擔任珠寶模特兒的鍾浠文及姜美兒即時被比下去。
冇備案免受打擊
不過昔日平板身材的靚靚今次突然升Cup，隨即引來僭建疑雲，但自信爆棚的她在接受訪問時否認「打假波」，力證自己無添加：「唔係假o架！（做過手腳？）冇，我都唔識托，我似新人嘅感覺怕穿崩，又唔係特登拎出嚟嚇人，咁要睇到多啲珠寶，唔通着樽領咩。」她指今次性感裝扮由造型師話事，事前最令靚靚擔心的是打底工夫：「我呢啲舊派嘅會問可唔可以戴Bra，但十個有九個都話唔應該，（真空？）梗係啦。（選美後最性感一次？）極限o架啦，不過造型師話到依家呢個時候可以試吓唔同形象。」
本以為靚靚今次一身噴血造型，第一個「觀眾」必定是老公張智霖（Chilam），怎料事前為免被對方打擊，靚靚在大解放前未有向老公備案：「我唔知點講，唔覺佢會安慰我先，佢一係讚，一係打擊，唔想未着就受到不公平對待。」雖然沒有老公愛的鼓勵，幸有「打底專家」周汶錡教路防走光：「我係擔心點打底，我問咗專家周汶錡，佢sponsor咗膠紙同乳貼，佢都問點解女人屋企會冇『缽仔糕』。僭建唔係我style，逼條線出嚟又唔係我嗰個樣，佢連點黐都有話我知。」
搵藉口叫送珠寶
而靚靚身上的珠寶亦相當架勢，全身首飾合共約60卡，頸鏈更是品牌為她特別設計。提到今次打扮性感，問酬勞是否十分和味？她說：「舒服啦！之前未試過，要搵適當場合做呢啲，唔通去百貨公司剪綵着到咁咩？」至於若睇中珠寶首飾會否叫Chilam埋單？她直言從不避忌，亦不擔心價錢，可是會體諒老公搵錢艱難：「佢話搵錢好辛苦，都少咗『鑿』佢。（之前你生日有冇送？）通常我年頭就會收晒所有節日嘅禮物，會搵藉口叫佢送。」
靚靚性感現身活動，事後記者聯絡靚靚老公Chilam，他透過WhatsApp 回應「……」，之後記者再問，Chilam則回覆：「我開緊工，冇嘢回應喇！」
文：音樂組