祖兒風車轉髮夾保靚頭

容祖兒與李克勤相隔11年再合體開騷，前晚在紅館舉行一連12場「容祖兒李克勤演唱會2015」，兩人在台上載歌載舞，又搞爛Gag兼鬥嘴，期間兩人做出45度角舞蹈動作時，獲四名舞蹈員捉手捉腳的克勤有點腳震震，反觀祖兒就輕易做出動作。

狂插髮夾似針灸

克勤提到要多謝一個人時，祖兒搞笑問：「盧淑儀？」克勤反擊說：「係咪講呢啲先？你唔夠我講。」祖兒即投降說：「我扯白旗。」

戴假髮的祖兒獨唱時獲數名「肌男」抬起作360度激轉，由於動作頗快，假髮隨時飛甩，但祖兒未有出洋相繼續大跳大唱，換上多套西裝的克勤見到偶像、香港拳壇「神奇小子」曹星如捧場，即興奮上前握手。克勤講解舞台設計概念時，祖兒爆料說：「佢私下話男女婚姻係錯嘅。」克勤即窒她說：「你第時唔好結婚吖。」

祖兒被舞蹈員抱起360度轉，但她的假髮依然保持原狀。	放大圖片	放大圖片

兩人騷後受訪時都說另一半劉浩龍及盧淑儀有捧場，但為免成焦點只好坐在不起眼的位置睇騷。對於「腳震震」，克勤解釋：「個位上得唔好同唔理想。」祖兒被笑假髮黐得好實，她說：「雖然換衫時間短，但工作人員訓練有素，一嘢插晒啲髮夾落我個頭，好似針灸咁。」

克勤用結他自彈自唱。

祖兒作狀咀拗晒腰的克勤。

扭傷肋骨用腰封

祖兒透露其中一個舞姿因用力過度扭傷肋骨：「跳舞時要用腰封，如果有需要會食止痛藥。」問騷前有否與男友劉浩龍在家Run一次？祖兒笑說：「綵排完都攰喇，仲Run？」記者笑指是「瘟仔」的「瘟」，祖兒笑說：「我暈喇，你哋中文字好叻。」

採訪：音樂組