洪卓立沉默的GO羊
洪卓立（Ken）性格內斂沉默，跟娛圈行業彷彿格格不入，但經過八年洗禮後，他坦言其活躍程度成功由30增「GO」至60！自稱「為食積」的Ken當初更想過開日式串燒店一圓創業夢，但恰巧就被兩位師傅急急煞停而無奈擱置。愛情方面，與女友湯怡拍拖多年的他早已視對方為結婚對象，但提到成家立室，Ken即大嘆結婚無乜意思，但就受到愛心爆棚的女友影響，慢慢萌起生B念頭。
活躍度攀升
「入行呢八年來我嘅轉變有好多，由之前比較文靜嘅性格，變得活躍咗、佻脫咗，入行之前我都唔係點講嘢，更唔會成日出街或者去party，雖然依家都唔太鍾意，但感覺就比以前好，冇咁抗拒。打從第一日開始，我都知道自己唔屬於呢一行，甚至到依家都覺得自己同娛樂圈格格不入，不過另一方面，呢度又畀咗好多滿足感同得着我，先令我可以一直堅持咁耐！
若然當初冇入娛樂圈，我諗我會繼續做地產，其實喺我入行之前，都做咗八個月嘅地產從業員，嗰時都係啱啱畢業盲樁樁搵嘢做，咁啱屋企樓下又開咗間地產舖，就入咗去見，之後第二日就返工，返返吓就八個月。而呢八個月又真係學到好多嘢，亦覺得對我之後入行好有幫助，因為地產呢行都係要比較主動，所以呢個都係令我嘅活躍程度慢慢增加嘅因素，本身可能係零，做咗地產之後就到30，到依家就60，我都幾慶幸自己係入咗其他行業先至入娛樂圈，咁我先叫做再多啲啲嘢講，如果係由零開始就入呢行，我諗我死梗！
至於搞副業，其實喺好耐之前都已經有個創業大計，係有關飲食嘅，因為我自己好鍾意食嘢，而且覺得食係比任何嘢都重要，所以當時就諗住開間日式串燒餐廳，畀人飲吓酒、傾吓偈，不過正當我開始籌備嘅時候，就有兩個師傅不約而同咁叫我三十歲之前唔好創業，咁我都要迷信一下，因為兩個師傅都同一時間講30歲呢個字眼，真係令我卻步，所以就等吓。」
先創業後婚
「創業先？結婚先？我諗創業係急切啲，因為如果我可以創業成功的話，咁我個老婆本就會更大筆！但如果結咗婚先，我可能又要重新儲過，而且我又唔知結婚要幾大舊錢，咁嘅話我嘅創業大計可能又要再擱置。其實我哋都認定咗對方，結婚呢啲對我嚟講只係一紙婚書冇乜意思，只係畀女方嘅一個承諾同埋一個儀式，而且我覺得唔係話結咗婚就係一個負責任嘅行為，如果真係想表達到自己可以照顧到個女仔一生一世，反而行動係更加緊要，就唔係單靠嗰一張紙嚟證明！
對於幾時計劃生B，我以前就好唔想生嘅，甚至係覺得我呢一世都唔會生，但佢（湯怡）就好鍾意小朋友、好鍾意動物嘅，可以話係愛心氾濫，喺好耐之前我都有同佢講過吓呢個問題，但佢當時聽到我話唔生BB，都只係『嗯』兩聲就算，但其實我都知道佢好鍾意嘅，而且慢慢個人大咗，諗法又有啲改變，開始覺得一個家庭係有小朋友先會美滿，所以依家都開始覺得係需要生嘅，不過都係三十歲之後嘅事！我諗第時我都會係一個嚴父，因為可能受屋企影響，就算我依家照顧隻狗嘅方式都係比較嚴厲，咁到時可能佢就負責氹同呵番，因為我始終覺得屋企係需要有個人做領導，可以同小朋友傾吓第時嘅路要點行。」
護母心切
不善辭令的Ken雖然從未跟家人說「我愛你」以表關愛之情，但言談間亦能感受得到他對家人的着緊與關懷，尤其提到其母整日為他的內地粉絲而頻撲時，他更顯得非常激氣，並笑指她為「魔教教主」。認為行動最實際的他更表示自己性格跟哥哥、爸爸相似，愛意從來不會用口說出來，只會以行動表現。
「屋企人依家都有8成明白我依家做緊啲咩，不過就有啲時候未必會明我或者公司嘅決定同處理手法。尤其係我媽咪，我成日都話我媽咪好似『魔教教主』，因為佢成日會同我內地啲fans偷偷哋見面同傾偈，但我覺得咁樣唔好，而且我最唔鍾意嘅係，我係呢行，但我媽唔係呢行，我媽亦唔後生，加上佢條腰又有事，我就唔係好鍾意佢周圍走咁頻撲，所以我好多時都叫佢唔好去，或者唔好咁專注去做一啲有關我工作嘅嘢，但佢又唔聽，覺得佢哋係米飯班主要慰勞吓，咁呢啲係要嘅，不過係咪一定要做得咁頻密？又係咪一定要係我媽做呢？我就覺得唔係囉！
我諗我都係一個鍾意用行動表達多過用口講嘅人，呢一點都幾似我爸爸，佢喺屋企其實係飾演一個唔係好出聲，又幾嚴厲嘅領導者，而我媽就好多嘢講，所以佢往往就充當住一個接線生嘅角色，因為我哥、我爸同我性格都好似，又係好多嘢諗唔係好講嘢，就連做錯嘢都唔會講對唔住，亦唔會講我愛你嗰啲。但雖然係咁，我哋嘅關係都唔會話疏離，都知道大家好錫大家，有咩事都會即刻奮不顧身咁幫手！」
後記：為食Ken
自稱「為食積」的Ken身形雖然瘦削，但對飲飲食食卻有無止境的渴求，在拍攝當日，他更邊chok邊計劃在哪兒吃午餐，並即收起沉默寡言的個性，滔滔不絕地分享附近地道美食！
口述：洪卓立
筆錄：鄧倩兒
攝：黎志輝
場地：Decor collection帝家設計
髮型：Davy Yu＠SALON AMAEONE
化妝：Circle Cheung
服飾：izzue＠I.T