李嘉欣送仔寄宿學獨立

李嘉欣（Michele）昨日為側田與梁家玉主持的無綫節目《閨密教煮》擔任嘉賓，李嘉欣自言今次是來品嘗美食，笑言無謂獻醜下廚：「自己驚血所以好少掂肉，我識整甜品、西餅。（最叻係煮乜？）最叻係煮即食麵，哈哈，即食麵都有藝術o架，試過整甜品buffet，十幾款靚靚影吓相都幾開心。」

未試過老公手勢

有老公許晉亨愛錫的李嘉欣過着幸福少奶奶生活，問到老公最讚賞她煮甚麼？她笑說：「可能男人唔係咁鍾意食甜品，佢鍾意食肉、牛扒，我整完啲甜品佢唔係好欣賞。（老公煮嘢叻過你？）佢講就好叻，話整呢個餸好勁，但結咗婚幾年都未食過，係一個傳說。（恨老公煮一次？）反而希望第日一家三口一人煮一個餸。」

李嘉欣（左起）與梁家玉、側田開心做節目。

許晉亨與兒子許建彤親子樂。（資料圖片）

鍾意男仔硬淨啲

李嘉欣疼愛兒子許建彤，但卻沒有寵壞兒子，打算小學後期送兒子到外國寄宿讀書，讓他學習自立，她說：「男仔要獨立，但香港環境好難訓練到佢獨立，可能小學後期會送佢去寄宿，等佢識朋友、知多啲嘢，冇人幫佢，我鍾意男仔硬淨啲。（捨得個仔寄宿？）我諗我會移民，唔放心、唔捨得，可能會喊一個月。」李嘉欣透露兒子飲食平常簡單，兩母子間中會齊齊做Pizza、朱古力蛋糕享受親子樂趣，她說：「有啲朋友連糖、朱古力都唔畀小朋友食，我就唔會嘅，遲早都要接觸呢個花花世界。」

採訪：影視組