C AllStar三缺一 有口難言
組合C AllStar成員On仔、Jase及King昨日與保良局副主席陳細潔到藍田探訪社區中心，宣傳將於本月26日舉行的籌款騷《星光熠熠耀保良》，C AllStar三子與公公婆婆設計中秋心意卡，又即場獻唱及派月餅，冧得一班「老友記」拍爛手掌。提到昨日三缺一，三子表示成員釗峰正在外遊散心未返港，記者笑問釗峰是否失戀要散心？起初On仔三人扮有口難言，其後才說：「唔係，因為之前我哋開騷佢最緊張，表演期間佢又整親，膝頭哥爆缸，所以佢係去療傷！其實我哋三個都有去旅行，Jase同King仲喺日本相遇，真係夾都冇咁啱！」
陳細潔被求婚
他們又表示慈善騷當日不在香港，因此昨日率先進行探訪，總算為慈善出一分力，問到下次再參與慈善，除了唱歌外，還可嘗試甚麼表演？On仔表示在安全範圍內，任何高難度演出也可接受，King卻笑說：「我驚心口碎大石，我哋太瘦，怕碎完大石自己都碎埋。」
陳細潔表示目標籌逾千萬善款，並邀得那英、張智霖、Twins、G.E.M.、杜麗莎、許廷鏗及胡鴻鈞等演出，相信節目會非常精彩。問到中秋有否約會？向來多追求者的細潔表示現正挑選當中，問到是否想「人月兩團圓」？她笑說：「好多人識我兩、三個月就求婚，可能我係待嫁樣，但唔習慣咁迅速，都係算啦！自己人大咗要好謹慎，但好多個話唔嫁就搵第二個，咁就唔好阻人啦！我自己覺得係寧缺勿濫。」
文：影視組