諸葛疑患抑鬱瘦到離罩
身為娛樂公司老闆的諸葛紫岐昨晚出席活動時，身形激瘦至晚裝離罩，她表示因近期忙於籌備公司的新電影，現在只剩下80多磅，且有情緒壓力要求醫，更被醫生指她疑似患有抑鬱，她即叫醫生別要嚇她，而談到囝囝時還不禁眼紅紅。
諸葛紫岐（Marie）昨晚出席護膚品活動時身材明顯比前瘦多了，她所穿的晚裝上圍更鬆得離罩，雙手亦非常纖瘦，她說：「壓力大，我瘦咗好多，一個月瘦咗10-15磅，依家得番80幾磅，因為公司搞緊部新電影，全部嘢我都要參與，全部(口野)都做，原來好嘅作品要付出咁多。（自己演埋？）冇諗，依家係諗緊男主角係邊個，我鍾意嗰啲導演又唔鍾意，一係就編劇唔鍾意，佢哋鍾意嗰啲我又唔鍾意，好多嘢拗，有時我仲會唔記得食飯。（老公有冇心痛？）佢有祝福我，話搵錢好辛苦，佢唔覺得我瘦係咩一回事。（女主角係咪張栢芝？）都會搵番自己公司(口的)演員，要同導演傾，唔係我一個人話事，團隊要一條心。」
講湊仔眼濕濕
至於投資了幾位數字？Marie說：「8位數字一定有，希望唔使過9啦！（怕唔怕會有厭食症？）我今次返嚟會睇醫生，有情緒壓力，要搵方法紓緩吓，未至於要食藥，有同醫生傾過電話，佢講到好恐怖，話我有(口的)抑鬱，我叫佢唔好嚇我。」問到她如此忙碌豈非沒時間湊B？她不禁眼濕濕說：「事業好辛苦，湊小朋友都好辛苦，做媽咪都好偉大。」
靚靚「事業」矜貴
同場的另一嘉賓靚靚袁詠儀就以心口透視裝上陣，略帶性感，記者笑指她騷了半吋事業線，她說：「一吋都好矜貴o架！（老公唔畀？）唔係，係我自己力有不逮。」她透露剛完成一部內地劇，飾演宋慶齡一角，是個大挑戰，現休息到聖誕再開工，會轉內地經理人公司，她說：「之前覺得40歲嘅女演員好似走下坡咁，依家反而好多人搵我做嘢，原來自己咁多年建立(口既)形象係健康嘅，都覺得好感恩同滿足。」
文：名人組