R&K處女碟主打「童」情心
組合Robynn & Kendy由把翻唱歌放到網上，到簽唱片公司正式出道，去年參加內地熱爆節目《中國好聲音》第三季，打開華語歌唱市場的知名度。她們將於月中推出處女國語大碟《如果．我不完美》，邀請著名插畫家謝曬皮繪畫歌詞集內頁配圖，帶出歌曲中的童真與感性！
首張國語碟的誕生，Robynn直言《中國好聲音》為她們開拓華語歌曲市場：「多咗內地、台灣同星馬嘅朋友認識！隻碟除咗有新歌，都有啲比較多人識嘅廣東歌改編。」Kendy則指歌曲貫徹「治癒」作風：「一路以嚟都想講，自己或者朋友、家人，成日都會碰到唔理想嘅事，想我哋嘅歌陪佢哋面對，畀多啲正能量大家。」
談到首次與謝曬皮合作，Robynn笑言對方為組合帶來「平衡」：「我哋一路被標籤做偽文青，今次搵個真文青幫我哋balance番！」Kendy說：「藝術無論係畫、音樂，都係想講故事，share自己嘅內心世界。而我哋構思嘅時候都想加啲得意嘅元素，公司知道咗idea又識謝曬皮，就撮合咗呢次合作。」
埋藏陰暗面
Robynn更謂從未見過謝曬皮，好奇對方繪畫的靈感。謝曬皮即大讚Robynn & Kendy歌曲如清泉：「今次令我勁loop佢哋啲歌，真係好似清泉，感覺好脫俗！加上佢哋個樣又好脫俗，我又脫俗，成件事好水乳交融，哈哈！畫嗰時最大困難係佢哋啲髮型轉嚟轉去搞到我好混亂。而今次畫風同平時都有分別，收埋咗好多自己嘅陰暗面，用鉛筆去sketch，配合番佢哋清純可愛嘅形象！」Robynn表示想知其中一幅畫的意思：「有一幅係有九個窿，其中兩個窿有個頭伸出嚟。」謝曬皮解釋：「隻碟好多歌都有童真同青春嘅感覺，令我諗到扑傻瓜！」
自省不足處
Robynn坦言兩首新歌能用最初寫的demo製作令她感高興：「兩首歌都由最原始版本開始，經過微執變成今日嘅《如果一天有25小時》，係一首好傻嘅歌，講我全日hea走晒啲時間，而《我不完美》係一段禱告，講人生會經歷開心唔開心，有時會想反思吓自己好多地方做得未夠好，想透過呢首歌抒發出嚟，都想歌迷感覺到。」而Kendy就指改編歌《想怎樣》令她最難忘：「好難得同Rocky（陳樂基）、鄧小巧合唱，諗起大家喺錄音室jam歌好開心。」
文：陳丹
攝：李柏儒
髮型：Eve@Queen's Private I
化妝：Kristy facedesigner