As One攻韓國：唔可以出醜
As One加入新成員後隨即遠赴韓國集訓，訓練短短個多月後正式進軍韓國，成為首隊代表香港攻韓的女子組合，雖然密集操練令壓力大到爆煲，新歌甚至形象都被批評抄襲韓國新進女團，不過她們站上舞台一刻，面對韓國粉絲應援，負面情緒一掃而空，只記着「絕不可出醜丟香港歌手架！」
組合As One為打造成韓團不惜飛到韓國特訓，更推出首支韓文歌《Candy Ball》，成功登上韓國音樂節目出道，然而新成員Chloe及Kayan剛加入便要密集訓練及唱韓文歌，會否感不習慣？Chloe說：「一見面就一齊住同訓練，默契磨合得快。」
四女說沒想過公司會安排在韓國出道，要在短時間訓練並登上舞台，雖然興奮但壓力倍增，甚至試過爆喊：「Shin同Chloe係水做，不過就算喊我哋都冇諗過放棄唔練，甚至知道個時間表好緊密吃力，但我哋都好想喺短時間做得好，攰到想嘔都會做，絕對唔可以出醜。」
與少時同台
辛苦個多月後終在韓國節目亮相，當她們與少女時代站在同一舞台時，坦言有夢想成真的感覺，問香港與韓國在錄節目上有何不同？Nata說：「我哋要事前拍Dance video等放送局知邊句邊個唱，然後Live嗰日有兩次Rehearsal，我哋仲要捕捉唔同鏡頭。（難？）第一次見鏡頭飛埋嚟真係有啲驚，表情好驚慌，韓國社長都問『點解我哋可愛嘅樣，緊張嗰陣變到咁唔可愛？』好彩習慣咗都Catch到鏡頭。」
韓觀眾熱情
不過新歌與韓國新女團GFRIEND的出道歌因同一作曲家而曲風相似，被網民狠批抄歌抄風格，對此她們說：「Arrangement差唔多但Melody唔同，其實有出名嘅作曲家作曲已經好榮幸，有比較都係好事。」她們以香港組合身份闖韓國，就算知名度遠遜韓國新團，但觀眾反應仍讓她們窩心：「佢哋好熱情，無論新人定前輩都會拍手鼓勵，甚至有香港粉絲去睇騷咁啱見到我哋，都覺得好驚訝。」
文：音樂組
攝：張福宏
髮型：Linfa＠IL Colpo TST
場地：Dance Union＠Sunny Wong