蔡思貝捱撞趴地 美魔男救駕
藝人蔡思貝日前為新劇「瞓街」拍攝車禍戲，劇中吳啟華飛身英雄救美，期間思貝不慎露黑bra及事業線，認真搏命！至於「師奶殺手」吳啟華甫現身即引來大批「自由行」舉機影相，果然「美魔男」魅力無法擋！
蔡思貝、吳啟華與譚凱琪日前於大角咀街頭拍新劇《純熟意外》，劇情講述譚凱琪遭求愛不遂的追求者意圖謀殺，她跟思貝在公司樓下被電單車撞倒，此時啟華突然出現英雄救美飛身撲救。拍攝期間，身穿白色鬆身衫的思貝，瞓身「趴街」扮倒地，一度不慎露出黑bra和事業線，春光乍洩。
操腹肌做打女
談到電單車高速在身旁駛過，思貝卻未有擔心發生意外：「我好相信所有工作人員、武指、電單車手，佢哋個個都好專業，反而一驚仲會出錯，因為騰雞可能走錯位。（有買保險？）唔清楚公司有冇買，但由細到大屋企人都有幫我買，希望唔需要用。」劇中不乏動作戲，她稱不介意做「打女」，更笑謂：「如果畀幾個月時間我操吓，我唔介意練六舊腹肌出嚟。」
吳啟華迷倒自由行
有「師奶殺手」之稱的啟華，甫現身即引來大批內地旅客圍觀和拍照，令他不禁拎出手機拍下墟冚場面。身為美魔男的他跑步、游水、踩單車操fit拍劇，有否練出腹肌？他笑道：「我呢啲老人家冇所謂啦，做過運動都有少少嘅，但冇刻意去健身房操啲乜。」他讚思貝聰明開朗，不似新人：「好多方面佢都幾老練，基本上都好合格。」提到六歲女兒於內地升小一，他自言不是嚴父：「細路仔唔需要讀書太叻，唔太差、合格就ＯＫ，見到啲細路讀得叻嘅好大壓力。」
有傳港姐冠軍麥明詩搭上排舞師麥秋成，亞軍龐卓欣爆麥秋成與緋聞女友思貝食飯，思貝坦承在公司相約「男友」食飯，又笑指「冇牆腳可撬」：「我同麥秋成係朋友，佢哋就唔知道，但相信唔會咁快，港姐排舞好短時間，佢哋一路好專心選港姐，如果用心選美都冇時間拍拖。」
文：影視組