丁子高：夫妻檔實有拗撬
夫妻檔合作難免有爭拗，身為過來人的歌手楊千嬅與丈夫丁子高（Real）亦參加內地真人騷《極速前進2》拍攝，Real昨日受訪大方承認：「鬧交一定有，尤其呢啲過關挑戰，其實我係真心鍾意呢類型冒險節目，我又唔係幕前人，唔需要顧慮鏡頭點拍我，而且人一定有情緒o架啦，而千嬅係藝人，佢會有少少包袱，不過佢不嬲都真性情，所以都冇乜粉飾。（會否影響感情？）唔會，兩夫妻就算正常生活都實有拗撬，玩完夜晚又一齊食飯，之前千嬅fans問我做乜咁惡話千嬅，咁玩緊比賽梗係緊張o架啦，呢啲係真情流露，我哋又唔係古代人，唔同以禮相待，相信觀眾都係想睇呢啲！」
另外，千嬅日前於廣州開巡唱，丁子高、楊父和弟弟特意捧場，入行二十年的千嬅笑言：「最近有個靚仔搵我合照，佢竟然話『我媽咪好鍾意你』！都值得開心嘅！」個唱因她突然生病而改期，對於歌迷幾乎零退票的支持，千嬅兩度泛淚感激。她又與嘉賓梁漢文合唱《滾》，更用自拍神器與台下自拍。
