張繼聰真槍上陣 孖楊明殺敵
由張繼聰主演的無綫新劇《收規華》，可謂開正他亦正亦邪的戲路，劇情雖講述他收黑錢，又與楊明飾演嫉惡如仇的大頭綠衣，同時愛上了自梳女楊怡，但這對「聰、明」組合最終攜手滅罪，有大量內心戲、動作戲給阿聰盡情發揮！
由張繼聰、楊怡、楊明及林夏薇主演的新劇《收規華》，故事發生在民初，飾演收規華的阿聰，雖然身為警察，卻向市民收賄，是個正中帶邪的複雜人物。監製方駿釗說：「雖然今次係我同阿聰嘅第一次合作，但我之前睇咗佢喺《忠奸人》同《巨輪》嘅演出，覺得佢好適合演亦正亦邪嘅角色。佢演得非常精彩，而且好搏命，雖然我哋預備咗替身，但有啲動作場面佢都自己做番，好專業，可能佢有跳舞底，身手唔錯，我畀佢95分！」
效果好不敢居功
阿聰喜獲監製好評，卻不敢邀功：「好多謝監製，但我諗95分當中有七、八成分數係屬於劇本、其他演員、台前幕後嘅功勞，我覺得今次好幸運，因為大家都拍得好投入、好有心。同楊怡雖然係第一次合作，但開工第一場已經好有默契，阿怡真係一個人又靚、性格又好嘅好演員。我同林夏薇亦都有好多對手戲，我覺得薇薇演戲嘅功底好好，我相信套劇播出後，佢個角色會令好多觀眾對佢另眼相看。」
阿聰除了周旋於兩位美人之間，亦會與同時戀上自梳女楊怡的情敵楊明，聯手破滅犯罪集團，動作戲連場，阿聰說：「今次好多打鬥同槍戰戲份，係空彈真槍拍攝，好刺激，好震撼，我哋用咗好多心機去設計場面，係一次難忘經驗，我都好期待播出嗰陣睇番！」
文：影視組