祖兒為克勤減磅 自嘲變機場

容祖兒昨晚與周柏豪、糖妹等出席品牌頒獎禮，穿五吋高跟鞋的祖兒以全白露臍連身短裙上陣。身形已弗爆的祖兒透露，要開始要為下月跟李克勤合作的演唱會減肥節食：「原本冇諗住節食，但早幾日同克勤排舞，有個動作我要跳起，佢伸手抱起我，但我發現佢好似托唔起我，所以依家開始每日只食蛋白質、雞胸同少少菜。」祖兒謂想減十磅，教練教她每日要空肚跑一個鐘。

克勤擦黃油蟹

問祖兒可有叫克勤操肌？她謂：「我減肥佢就練大隻，大家就可以拉近距離。」她笑說克勤知自己瘦，故有食黃油蟹增肥：「好嬲！邊有人開騷前仲食黃油蟹？」再問祖兒如又減肥，可會令上圍縮細？她自嘲說：「我都已經係『微波爐』啦，（再減咪變私人飛機場？）係(o架)！連（事業）線頭線尾都冇埋。」她又說不想太瘦，笑言太瘦會顯得其哨牙更明顯。

祖兒笑克勤開騷前還食黃油蟹。（資料圖片）	周柏豪笑言自己的上半身已露無可露。	麥子樂（左）與衛詩雅孖住現身。

柏豪跌市損手

柏豪承認今年賺了很多廣告收入，問會如何獎勵自己？他即大嘆在跌市中蝕錢，並暗示至少蝕了約數十萬：「蝕咗架歐洲車，人民幣又貶值，股票又損手，得樓唔會跌。（女友有冇鬧？）冇，不過佢話我唔聽佢講要止蝕，依家都唔會再入市住。」他亦透露想再買樓，但仍未儲夠錢，講到王祖藍買了過億豪宅，他謂：「真係要努力賺錢。（多啲露肉可以賺多啲？）我上半身已經露到冇嘢好露。」

糖妹則謂之前跟王菀之拍的家具店廣告得獎，笑言該店很想她快點買樓：「嗰邊不停問我使唔使要電視，梳化使唔使換，但我都希望盡快置業。」

文：音樂組