阿Sa護霆心切急凍戀情

阿Sa被追問戀情卻冷淡回應，阿嬌見狀即為好姊妹擋駕。

前晚英皇紅星謝霆鋒、容祖兒、古巨基、組合Twins等逾20位歌手，齊集澳門威尼斯人金光綜藝館演出《英皇娛樂15周年和華麗有約澳門演唱會》。一開場，眾英皇歌手走到台上對公司講祝賀說話，其後英皇娛樂集團主席楊受成與太太陸小曼等就到台上主持切蛋糕的儀式，並為演唱會揭開序幕。眾歌手中最矚目可算是阿Sa和William這一對，還有分手男女鍾舒漫（Sherman）和吳浩康（Deep）及緋聞「密友」的張敬軒和關智斌，不過三pair人全被「拆散」。被內地封為「小鮮肉」的William出場時獲最多歡呼聲，至於女友就被安排企另一邊。

阿嬌擋駕口窒窒

早前阿Sa被拍得與短暫留港的William出街拍拖，貴為天后的她更素顏落車買豆腐花「服侍」男友，相當甜蜜。不過前晚問到阿Sa是否與William很久不見？她卻冷淡回應：「唔答呢啲，工作先。（William受訪時話買樓畀你？）我唔信，肯定係你哋自己作。（收到唔開心咩？）我日日都好開心。（有共識低調感情？）不嬲工作時都唔想講其他嘢。」好姊妹鍾欣潼（阿嬌）見狀幫忙擋駕：「問我啦。（幾時有新戀情？）對唔住，我唔知，呢個我預算唔到。」阿Sa又指世界各地接連發生意外造成傷亡，覺得生命很脆弱要珍惜。

阿Sa和William全晚分開企，同場零交流。	William在內地爆紅，為怕惹來粉絲呷醋而將戀情低調。	英皇娛樂集團主席楊受成（左四）與太太陸小曼（左三）到台上主持切蛋糕儀式。

一個月狂飛32次

至於William跟女友口供一致，暗示不多談女友全因避輿論壓力：「依家工作量大咗，會有更多唔同嘅聲音。（怕粉絲呷醋？）有好多唔同嘅報道，就算香港都有。（在內地爆紅後與阿Sa地位不再「女尊男卑」？）呢啲唔答喇。」他透露內地工作排到下年年底，農曆新年假返港三日外，期間只曾回家一、兩次，最高紀錄試過一個月搭32次飛機，幸女友阿Sa很支持他，暫未有結婚打算。再問他何時買樓送女友？他兜兜轉轉指阿Sa都好多樓，最後將「難題」推落女友身上，着傳媒問阿Sa求脫身。