Kelly凸腩撐到底
天后陳慧琳（Kelly）現身周筆暢的紅館個唱擔任嘉賓，獻唱時以超短熱褲示人，露出煞食長腿，惜未知是否動作太大，不慎春光乍洩露底褲邊，又凸出肚腩仔。周筆暢則罕有性感登場，笑言令男化妝師怕醜面紅。
內地歌手周筆暢（Bibi）一連兩場的巡迴演唱會《BOOM！周筆暢巡迴演唱會2015香港站》前晚在紅館開鑼，首次來港開騷的Bibi獲父母撐場。Bibi先罕有地以性感黑色Deep V長裙出場，站在台中慢慢升到半空，並一口氣唱出多首歌曲。之後Bibi特別為香港觀眾特設串燒粵語歌環節，唱出一系列經典廣東歌，包括《爛泥》、《活著Viva》、《戀愛大過天》等，令全場high爆！一向不多話的Bibi以歌聲娛樂大家，亦走到台邊跟歌迷握手作近距離接觸。
樣貌10年不變
其後Bibi換上印第安人look上台，並請出嘉賓陳慧琳（Kelly）手拖手合唱《星夢情真》。已為人母的Kelly穿上超短熱褲，露出白滑長腿。兩人透露今次是第二次合作，首次合作就是10年前拍攝電影《春天花花同學會》。談到兩人樣貌跟十年前沒有大改變，Kelly即大讚Bibi說：「你外形冇乜點變，但內裏變咗好多，10年前啱啱出道好似個小妹妹，10年後依家係個獨當一面嘅歌手，好有台型！」接着Kelly單拖唱出《大日子》，不時自high扭蛇腰，但未知是否因動作太大，或熱褲太短而不慎露出底褲邊，側面看還見到Kelly沒有縮肚腩仔。
男化妝師面紅
Bibi在後台受訪時表示滿意頭場表現，但大前日綵排時沒有留力，導致聲音有點沙。問到演唱會形象是否刻意女性化？她指近幾年都跟過往男仔頭有所改變，講到穿上低胸裙，她笑謂：「男化妝師幫我個身搽粉時塊面都紅晒，佢未見過我咁，但露好多我就唔OK。」
文：音樂組
攝：鄭家俊