糖妹揀男友：矮過我唔得
女星黃山怡（糖妹）日前接受東網電視《娛樂onShow》訪問，力Sell自己早前推出的新碟加旅遊書：「買書又送碟，係咪好抵玩？」糖妹自爆擇偶條件是要高過自己，又大呻同圈內人拍拖好煩！
日前歌手兼新手作家黃山怡（糖妹）擔任東網電視《娛樂onShow》嘉賓，接受主持陳振安訪問。提到早前推出的旅遊書《台北細細步》，她坦言對銷量感滿意：「有人係衝住入面隻CD去買，因為我都好耐冇推出有3首歌以上嘅碟，今次呢隻有4首歌！」
自誇寫書誠實
書中介紹了過百樣美食，糖妹堅稱自己全部都試過，更自誇誠實：「入面所有嘢我都食咗，就算去咗試，但係覺得唔好食我都唔會寫入去，係本好誠實嘅書！」
當主持表示香港人去台灣旅遊，通常都是短Trip，糖妹即推薦必吃小食：「係我一世人食過最好食嘅葱油餅，廿蚊台幣（口架）咋，好抵呀！佢長期排隊，喺當地已經好出名。佢係一間百幾呎嘅小屋，有4個人塞喺入面，你一路會見到佢哋喺度搓粉搓麵團、加葱落去，隔籬嗰個就已經用熱嘅油鑊去炸，炸完即刻食真係脆卜卜！唔會等到佢『腍』咗，啲葱嘅香味最揮發到出嚟！如果你想食得再啜核啲就加隻蛋，喺炸好嘅葱油餅上面，隻蛋即刻熟，再放入個口入面，哇！真係不得了！」
戀圈內人呻煩
被主持人笑謂「過多幾年就係中女」的糖妹更自爆對男友的要求：「身高矮過我真係唔得，高過我好易啫！當你試過同圈內人拍拖，你就會知真係好煩（口架）！」想知更多糖妹製作旅遊書及CD的有趣過程，就記得留意東網電視《娛樂onShow》！
文：專案組
場地：Rustico