甄澤權幻化港式魔術
憑演出電視節目人氣急升的魔術師甄澤權（Louis），巡演亦十分成功，他寄望能在年尾踏上紅館！事業有成的他，除創作更多魔術令自己能更上一層樓外，現實中他亦想「買到一層樓」成家立室。他揚言要每個魔術都與本土文化有關，令他成為「香港人的魔術師」！
魔術師甄澤權既拍過電視節目，亦開過巡迴騷，更出過書，問到還想挑戰甚麼？他揚言要成為屬於香港人的魔術師：「之前個show反應好好，畀到信心我想喺年尾上紅館開part 2。有得拍戲都OK，平時做魔術都要喺台上扮嘢，如果練到啲演技都有幫助！」曾經打破健力士世界紀錄的他更謂：「唔一定要打破啲咩record，但想keep住做啲同香港有關嘅魔術，唔單止做一個出名嘅魔術師，而要做一個香港人嘅魔術師！自己亦有啲新嘅大計，同啲名勝好似鐘樓、維港、ifc有關。成家立室一直都想，一路都儲緊錢買樓，做魔術師使費大，要買道具各樣嘢，嚟緊呢一、兩年睇吓可唔可以慳啲啦！」
懶理家人反對
回想19歲初次接觸魔術，Louis承認為魔術改變很多，令本來堅決反對的家人都支持他：「本身讀marketing，入咗魔術學會無啦啦做咗會長，仲代表自己大學去表演，突然覺得學咗樣嘢好開心、好鍾意！」他坦言由「三分鐘熱度」變得專注：「當時住hall日以繼夜咁玩魔術，到畢業要搵份工又諗唔到做乜，既然做緊part time魔術師就不如試全職。但屋企人強烈反對，覺得魔術師唔係專業而係街頭賣藝，冇固定收入搵唔到食。我冇理佢哋反對一路做，佢哋見到魔術呢樣嘢改變咗我咁多就變成支持。」
擁港版「大衞高柏飛」之稱，Louis直言想大家記住他的魔術，記住他叫「Louis Yan」：「2010年喺美國攞咗個獎，大衞高柏飛都參加過呢個比賽亦拎過獎，傳媒就開始畀呢個外號我。我開心嘅因為佢都係我偶像，但近年都想做啲自己嘅嘢，想大家講得出我變過乜，想大家記得我！我最拿手係同觀眾互動嘅魔術，而唔係魔術師喺台上高高在上咁。」
呻創作路艱難
萬事起頭難，Louis指玩魔術亦然，現實中收入始終重要：「試過得千幾蚊一個月，廿幾日冇嘢做。未拍節目前做全職魔術師都成十年，去中小學教興趣班，做康文署嘅表演維持生計，仲要不停儲錢去外國比賽。」在《街頭魔法王》變出幾百個魔術看似簡單，Louis苦笑稱創作極艱難：「一定要新，每次都唔同，唔同唱歌有金曲次次可以唱同一首！」
文：專案組、陳丹
攝：張福宏
化妝：Carol P. Wong