朱千雪求安心要男人保護
藝人朱千雪（Tracy）與洪天明在新劇演一對閃婚的歡喜冤家，又爆劇中會將天明剝光豬兼五花大綁。不過Tracy笑言戲外屢受天明保護，直認情迷保護欲強的異性：「我鍾意有保護能力強嘅男仔，（會閃婚？）唔會，我比較傳統，要順序發展，由相識、拍拖、結婚到生仔！」
朱千雪於正在播出的無綫劇集《拆局專家》中化身電腦黑客，並與洪天明演歡喜冤家在賭城烏龍閃婚。Tracy自爆劇中野蠻女友上身反枱鬧交，更將天明剝光豬兼五花大綁！她笑言今次成功玩謝天明：「我喺劇中灌醉佢，仲剝晒佢啲衫同縛住佢，再車佢去市區叫人影相！（咁野蠻？）我發嬲仲掟嘢，將牛奶同三文治掟落佢身上！（天明處於捱打狀態？）好彩佢有武功底子，我唔擔心。（佢平時喺遊戲節目成日玩你，今次玩番佢？）我跟劇本嘅，但我預咗畀佢報仇o架喇！」
讚天明英雄救美
不過Tracy透露戲裏戲外均受天明保護，她直認現實中鍾情保護欲強的異性：「我有場戲被綁架兼掟落海，天明好照顧我。我喺海沉得太耐，佢會搵人拉我上嚟，好安心！我鍾意英雄救美橋段，鍾意有保護性強嘅男仔。（有冇遇過？）其實幫我拉門，我都好冧o架！」
結婚同家人交代
談到在劇中即興閃婚，Tracy笑言怕怕：「我唔會（閃婚），因為要一生一世，起碼都要拍一陣拖。我唔會即興喺街識一個，傳統人結婚係好緊要嘅事，唔可以唔同家人交代。況且我比較鍾意傳統啲，由相識、拍拖、結婚到生仔！（定個目標期限？）都冇目標，要識到先諗。（有人追？）冇呀，工作為先！」
文：影視組
服裝：Caxx Carash
鞋：Dyos