何韻詩唱勻18區欠盡人情債
獨立歌手何韻詩近日以出品人身份自資舉行六場演唱會，她自爆曾多次被紅館請食「閉門羹」而感到相當無奈：「開頭我諗可能真係冇期啦，我唔質疑，繼續去申請，申請到二十次都唔批就開始有啲問號。」
今次阿詩坦言走勻十八區開騷不是為了賺錢，而是尋回香港的人情味及愛，所以欠下不少人情巨債陪她去「癲」：「今次真係爭落一條人情街數，因為有啲場地只可以容納到十幾個觀眾，冇可能為收支平衡而收一萬蚊一張飛。」她又再次感激身邊一班並肩作戰的隊友：「如果成Team次次要我計人工，我拎晒成副身家出嚟都未必做到件事，好感激大家仗義幫忙同打個折。」
另外，阿詩前晚舉行音樂會獲「女友」鄧九雲捧場，現場播放不少香港昔日照片，阿詩感謝有份提供照片的鍾楚紅。對於父親菇爹拖女入場，阿詩笑說：「管佢唔到，成家人放棄佢，佢向來過度熱情。」