周筆暢開紅館騷闖北極減壓
內地小天后周筆暢將在月底首度攻入紅館，開騷前緊張得壓力爆煲，除了來港微服出巡視察票房外，更遠赴北極展開一趟絕對零。C的靜修之旅，在旅程中絕「欲」減壓，好讓緊張氣氛急速降溫！
入行九年的周筆暢（筆筆）將在本月22至23日在紅館舉行「BOOM！周筆暢2015巡迴演唱會香港站」，首次殺入紅館的她零舍緊張，日前特意秘密訪港「監場」，到票務處視察個唱的賣飛情況，更未開騷先興奮，在紅館外圍瘋狂拍照留念！
被陳慧琳考起
筆筆坦言今次所以「緊張大師」上身，全因出道以來已希望在紅館開唱，如今夢想實現難免有壓力：「開紅館騷係我目標之一，心情好緊張，自己未喺紅館開過，我又唔係香港歌手，驚觀眾對我認識唔夠。」她又表示屆時將大唱九十年代經典粵語歌，包括歌神張學友、陳奕迅等金曲，但坦言最考起她的是翻唱陳慧琳的勁舞快歌。
開唱日子如箭在弦，筆筆為紓緩壓力，上月趁三十歲生日，闖入冰天雪地的北極散心，她說：「北極係我終極旅行目的地，咁啱有時間，就當畀自己一份生日禮物。成個過程帶畀我安靜力量向我重重一擊，十幾日入面自己冇任何欲望，成個人放鬆晒，平時生活環境冇辦法令自己好平靜，但喺極地冇任何干涉，有一日到咗北極點，落咗船四圍行，摸吓冰。」
靈感帶上舞台
她表示同行團友大多是中國遊客，所以被不少人認出，可是團友相當貼心，未有爭相要求合照，並透露將在北極感受到的靈感帶到舞台上。雖然筆筆踏入「三十大關」，但她自言心境與外貌仍保持年輕，問家人可有催婚？她笑說：「知道佢哋內心係有，但冇講到開口，自己都冇訂時間，開心就得。今年好難得返咗屋企同家人慶祝，往年成日喺北京做嘢，感覺返璞歸真咁。」
文：音樂組
場地：紅磡都會海逸酒店