萬綺雯膊盡何佩瑜贏半球
女星何佩瑜（Jeana）與萬綺雯昨日在活動上碰頭，萬綺雯今次沒有騷長腿，以斜膊裝上陣，Jeana則以大露背裝示人，前面薄紗從側面看，東西半球若隱若現，性感搶鏡。
Jeana昨日與萬綺雯到旺角出席美容活動，穿上大露背裝的Jeana，前透後露，性感搶鏡，反觀以長腿出名的萬綺雯，今次穿斜膊及膝裙，未盡晒長腿。Jeana解釋：「因為我好鍾意萬綺雯嘅長腿，咁我就送個背脊畀大家，（側面見到nude bra喎？）我黐咗膠紙，可能啲膠紙唔夠強。套衫係我揀，之前生日着過，着埋今次要抖半年至着。本來今日要拍戲，落雨取消，我演野蠻女友，有班觀音兵，（現實中都有兵？）冇，搵到鍾意嘅，一個咪夠囉！（有冇留意舊愛張柏文同新美心妹妹Keicy媽咪Fiona曾經談婚論嫁，但臨門撻Q？）冇，分手後雖然係朋友，但同佢冇聯絡，（咁陌生？）祝佢一切順利啦！」
年底返無綫拍劇
萬綺雯雖約滿無綫，但她說：「年底返去拍劇，部頭形式，詳情等佢哋公布，我大大話話都放咗十個月假。十個月真係悠長假期，之前係老公覺得我需要休息，再拍劇，我同我老公唯一考慮係我嘅身體狀況。（無綫以優厚條件游說你？）我哋合作好開心，依家我返內地拍嘢又得，充電又得，條件係滿意同開心。」
文：影視組