靚靚霸氣：我都有市場！
藝人袁詠儀昨日出席活動，對於外界不時大讚老公張智霖愈來愈後生，坦言從未感到壓力，更霸氣表示：「我都有我嘅市場！」
藝人袁詠儀（靚靚）昨日出席「CATALO全新概念店開幕典禮」，同場還有名媛何倍倩（Anina）、前華姐凌緣庭以及藝人陳倩揚。靚靚透露囝囝張慕童（魔童）快將開學，而早前一家三口就趁暑假到美國度假：「佢返學我就有番好多私人時間，我哋去咗美國兩個星期，我就做足工人兩個星期。」她又指今趟旅行目的是希望訓練魔童更加獨立：「我覺得好成功，至少佢會摺番自己啲衫落篋，好企理，仲有執篋同推篋！但都係家長問題，因為公公同婆婆湊，覺得孫係要嚟寵！」
老公緊張問去邊
對於外界不時大讚老公張智霖（Chilam）愈來愈後生，靚靚坦言從未感到壓力：「我都有我嘅市場，佢成日都問我去邊，仲緊張過我！我成日同朋友講笑，當有人問點解（兩公婆）成日一齊，我就話因為一個怕黑一個怕鬼，要互相保護！」而談到9月4號44歲正日生日，靚靚笑言：「踏入40歲之後，愈嚟愈唔使慶祝，最緊要健康同埋同最好朋友食餐飯，仲有小朋友陪住！」另外，對於與同屆的前華姐凌緣庭再度於公開活動中碰頭，她表示與對方相識20多年，但一直未有機會見面，她大讚對方無論在家庭及事業上也兼顧得非常好。
何倍倩深情望夫
而身為恒生新抱的Anina，透露與老公何乃斌今年結婚第10年，下月將舉行派對慶祝，早前更請來攝影師拍攝新「婚照」！她笑言：「人生有幾多個十年？我同老公講下次再影，個仔已經15歲，唔知下次會唔會帶埋女朋友！（到時會唔會呷醋？）15歲我接受到，唔好11歲就得！」問到拍攝新「婚照」可有回憶當時新婚的情景？Anina表示：「因為影婚紗相要有好多甜蜜角度，兩眼互相深情對望！咁結婚之後好少無端端對住老公咁深情，再影覺得好浪漫！」而陳倩揚則透露是該品牌的長期用家，大讚產品幫助她應付在懷孕期閒遇上的各種問題，如脫髮及腸胃等。
文：名人組