羅霖操體能 胸狠殺人
現年五十歲的藝人羅霖（Candy）自從出完寫真集後爆紅，昨午她出席活動時透露將接拍新戲，飾演殺手，為此需要鍛煉體能，並自嘲一把年紀才做體能訓練，Candy說：「公司啱啱幫我接咗套電影，9月尾拍，有時啲嘢真係唔好亂講，嗰陣時好多人都問我想拍咩戲、做咩角色，我話想做打女、拍喜劇，依家開口中，電影角色係做殺手，下星期開始要做體能訓練，好大考驗，哈哈，一把年紀仲要體能訓練。」Candy又表示該戲要到泰國拍外景，並有追逐場口。
囝囝陪練習
從未演過殺手的Candy透露兒子知道她飾演殺手後十分興奮：「佢哋平時都鍾意打機，佢知我做殺手，即刻話『媽咪我同你喺屋企練呀』，希望今次畀人睇到我另一面。（今次使唔使性感？）有性感嘅，因為殺手嘅衫通常比較貼身。（少布？）少布就唔知，不過要着高跟鞋跑，高難度。」
另外，身穿黑色蕾絲裙的Candy明顯衣不稱身，她自爆因前排寫真宣傳太頻繁搞到瘦了一圈﹕「同埋又病咗三個星期，加上傭人放假，洗碗洗到手都筋膜發炎，又要洗衫，已經睇咗醫生。」
文：名人組