周潤發：見人開心我都開心
親民巨星周潤發及發嫂對身邊人向來照顧有加，更以實際行動「餵飽」工作人員，早前《東網》報道發哥發嫂在片場設立「發記士多」，為工作人員提供免費飲食，包括港式小食燒賣、魚蛋、炒粉麵飯、奶茶咖啡等，甚至有特色涼茶例如養生飲品「紅豆水」供應，食物質素甚高，令同片的演員張家輝、李宇春、江美儀及王君馨等都大讚冇得頂！
報道出街後，市民都被發哥發嫂感動，紛紛經《東網》瘋傳報道及在《東網巨星》facebook（fb）畀like，至昨日已有逾2.3萬個分享及like，非常厲害！有網友大讚發哥是「人上人」、「真正偶像」、「一聽到發哥個名就已經想尖叫」，有網友更提起往事，細數發哥多年前已非常體貼：「當年我阿爸喺新藝城做，當時冬天喺新界拍外景，話發哥見全部人凍到震，啲飯盒都凍晒，叫咗發嫂同助手買十個羊腩煲，幾斤肉同菜及gas爐，叫全部人食飽先再拍（但發哥自己食菜only），之後幾日外景冇發哥份，佢都叫助手揸車送熱湯、糖水嚟。」
對於獲逾二萬人like爆，發哥昨日接受電話訪問時笑說：「二萬人咁誇？其實『萬歲』呢啲係成日做，大家一家人，都想食得豐富啲，搵食、搵食就係咁解。（開落去？）有位就做，要睇當時場地點，唔許可都冇辦法，但係見人食得咁開心我都開心！（咁咪使好多錢？）食得幾多？我呢啲都好，有啲開早班嘅冇啖好食呀！有啲新鮮嘢食吓先係最好。」
