陳慧琳潮媽轉型抗拒「老花宇宙」
睽違七年，陳慧琳（Kelly）換上索爆人妻及潮媽的身份，再次登陸紅館舉行演唱會，身形弗到爆的Kelly，自爆是懶人不愛做運動，更是為食媽最鍾意食豬肉、腩肉，若非要忍口，她必定是個肥歌手，承認怕老的她不敢想像50歲還在跳唱《花花宇宙》。
體能極限
闊別紅館舞台七年的陳慧琳，過去這段時間已變身為索爆人妻，更是圈中數一數二的潮媽，誕下兩個心肝椗「蝦餃仔」劉昇及「小龍包」劉琛，時間飛逝……
「眨眼就七年嘞，真係好恐怖，重溫七年前喺紅館演唱會尾場，我宣布婚訊嗰一幕都好感動，今年12月再踏紅館開騷，心情都開始緊張，其實每次做騷都好緊張，因為永遠有意想不到嘅事發生，又驚唔記得歌詞，又驚呢樣嗰樣，雖然距離開騷仲有幾個月，但我已經開始操練，鬆吓啲筋骨，因為太耐冇活動。做演唱會體力消耗好大，我都四十幾歲，唔係廿幾、卅歲，經過今次演唱會就知自己體力支唔支持到，做騷真係幾辛苦，因為我有好多快歌，最慘仲係好多hit歌都係快歌，想唔跳都唔得，但年紀上我唔會跳到好癲，最緊要型型哋，我啲粉絲會錫住我，相信佢哋都唔係想我跳到頭都甩。」
地獄時光
身形高挑的Kelly，天生一副模特兒骨架，即使佗B時，手腳依然纖幼，產後也能火速修身，教一眾媽咪級女士妒忌，Kelly的瘦身秘訣在於「忍」……
「我唔係好運動型，其實我好懶（o架），都係逼自己咋，如果我冇嗰啲快歌，我都係好肥歌手，因為我鍾意食嘢，結婚嗰時為咗keep住靚，梗係忍口，跟住冇耐就有咗，第一胎係瘦啲，但我第二胎係肥（o架），其實我好大食，好多女生都鍾意食甜嘢，但我就一般，最鍾意食鹹嘢，好似魚蛋、燒賣、叉燒飯，男人最鍾意食嘅燒肉、火腩就係我最愛。
一個三小時演唱會，體力係必須，淨係企足三小時已經攰啦，仲要跳喎，紅館幾大呀，行來行去，有啲歌衫又幾廿磅重，孭住條裙又唱又跳，都幾辛苦，如果可以着睡衣唱就輕鬆好多，或者着運動衫、背心短褲都好。今次演唱會有Part玩Super Hero（超級英雄）奇幻嘅，（服裝指導）奚仲文會幫我度身打造一個類似Cat Woman造型，嗰啲衫款貼到爆，所以咪要keep fit，雖然我操咗一排，但我冇磅過，我覺得自己冇乜瘦到，但啲肌肉實淨咗、firm咗，我都好勤力喺屋企做sit up，冇計啦！
我冇諗過破唔破到場數紀錄，一定破唔到，因為檔期得嗰段時間，紅館個期爆到七晒彩，做十幾場好攰，暫時開5場都OK，我好滿足，小小地玩吓，唔使咁大壓力，因為出騷前壓力大到食唔到嘢，雖然第一次做三面台，但唔會有大分別，記嘅嘢一樣咁多，歌詞、舞步、講嘢呀，以往經驗第一場着嘅歌衫，去到中間嗰幾場啲裙就開始要修改，做演唱會真係地獄式訓練，如果你問我拍戲定唱歌開騷辛苦？一定係唱歌辛苦，開演唱會係一個人嘅極限。」
怕老走樣
入行20年的Kelly，星途一直暢順，如獲幸運之神眷顧，更是圈中的異數，沒甚麼負面新聞，名副其實是個正氣女歌手，如果給她再選擇……
「我都覺得自己好彩，我絕對冇後悔入行，所得到嘅多過晒一切，畀我重新再揀，我都依然會揀做歌手，我由入行就遇到好多好歌，身邊都係嗰班工作夥伴，大家合作咗咁耐，佢哋做得好好，所以唔需要轉，好信任佢哋，佢哋就好似屋企人，我尊重佢哋嘅決定。入行最大得着係發覺好多人鍾意自己，未入行前我係個冇乜自信心嘅人，又唔係樣樣都掂，自己又唔係好靚，唔係好正，識少少唱歌，跳舞又唔係好好，以前喺學校，我都係唔多出聲，屬於好安靜嗰種，唔係風頭躉，入咗行自信心增加咗好多。
我冇諗過退休問題，如果要我唱到老，我OK（o架），唔好跳到老得唔得先？只要唔好跳咁勁，繼續去唱又有人聽，點解唔唱？下次係咪搞30周年？我又唔知，唔好諗太遠，唔通50歲仲出嚟唱《花花宇宙》咩，我都會驚老，我唔係怕外形變得核突，係怕甩牙、老花、骨骼疏鬆、白內障嗰啲，個樣皺皮我OK接受到喎。」
後記：寶貝仔捧場
媽咪喺紅館開個人演唱會，蝦餃仔、小龍包都未捧過場，Kelly話：「今次會安排佢哋去睇騷，只係希望佢哋捱到眼瞓，因為平日佢哋夜晚八點就瞓，啱啱係我開騷時間。」Kelly笑住話要在紅館後台預備定兩張床，囝囝一眼瞓就入去瞓喎！
口述：Kelly
文：May
髮型：GAeorge Shum＠Alchemy
服裝：Valentino