陳凱琳煲補湯餵飽嘉穎

昨日是藝人鄭嘉穎46歲生日，身為女友的陳凱琳（Grace）昨午出席品牌活動，晚上又要開廠拍劇，她笑言有活動工作好開心。提到如何為男友慶祝生日？Grace透露嘉穎正在橫店工作：「我12點打畀佢講咗生日快樂。（送乜畀佢？）我買咗，係有心思禮物，乜嘢係秘密，等佢下個月返嚟親手送畀佢。（你會唔會人肉速遞？）唔會，我要開劇，拍到12月中。」

靠視訊傳情

問到會否掛住嘉穎？Grace直言好彩有工開，可以專注工作，平時靠視訊通話維繫感情。拍拖後第一次與嘉穎過生日，卻未能正日慶祝，問會否感失望？Grace說：「唔會，工作重要，會食飯補祝。（親自下廚？）我煮嘢好渣，學緊煲湯。」為愛郎學煲湯，sweet爆！

拒送情侶鈪

至於大會送上情侶手鈪，問會否送給嘉穎箍住對方？她笑言：「手鈪好有意思，唔係（送畀佢）。（送情侶戒指？）我會好好安排。」另外，昨日凌晨Grace在Instagram上載一張嘴上沾有忌廉的BB仔相，更加生日蛋糕及心心符號，雖沒寫上送給誰，但擺明向嘉穎送上祝福。

文：名人組