雨僑拿手捉蟲 膽大「蟒」「圍」

女星雨僑、導演胡耀輝及監製田啟文（田雞）昨日現身商場，出席新片《猛龍特囧》「香港網絡男神選舉　惡鬥爬蟲考膽色」宣傳，司儀鄧洢玲表示原定有份出席的鄭中基（Ronald）因事缺席後，大會即播出Ronald早前拍下為電影打氣的短片。

嫌麥皮蟲樣衰

雨僑等先與9位香港網絡男神選舉參賽者各拎大烏龜等動物合照，雨僑捧着4呎幾長球蟒任影唔嬲，更自動波將牠放上頸，任其捐來捐去，雖然此種蟒蛇無毒且品性溫馴，但要「與蛇共舞」，並非個個女星都夠膽！

雨僑玩完蛇後，與胡耀輝及田雞輪流蒙眼伸手放入有昆蟲及田雞的透明箱中取出乒乓球，胡耀輝卻大呼：「喂！呢個真係唔得，蒙住眼係最驚（口架），真心驚呀！」最後要由他人代勞。反觀雨僑卻膽生毛，玩嘢地棄乒乓球不拎，偏要拎出箱中昆蟲，搞到司儀鄧洢玲依嘩鬼叫，雨僑打開眼罩得知是麥皮蟲時，還淡定說：「好樣衰呀！」

膽大的雨僑把4呎長的球蟒放上頸任影，令身旁的胡耀輝大為佩服。	田啟文及胡耀輝都要蒙眼摸田雞及蟲，兩個男人都大呼怕怕！	田啟文都要蒙眼摸田雞及蟲

唔怕對付小強

雨僑被讚比同場的男士還要大膽，她說：「蛇蟲鼠蟻我OK（口架），我細個第一隻養嘅寵物就係簷蛇，閒時我就捉啲蚊餵佢食，不過我都有嘢驚嘅，我好驚雀！（被襲擊過有陰影？）唔係，我都唔知點解，總之好驚，凡個嘴尖嗰啲都唔得，覺得佢醜樣，所以我決定婚後一定唔煮雞、唔煲雞湯，或者買雪藏嘅，我唔要見到個尖嘴。（雞毛掃驚唔驚？）藤條冇問題，有羽毛就好驚！試過3次屋企有自來雀，我覺得好恐怖。其實我捉『小強』（曱甴）都好叻，（羅力威驚唔驚小強？）我比較唔驚囉！（佢倚賴你幫佢捉小強？）咁任何朋友驚，我都可以保護佢哋。我屋企養咗貓咋，唔方便再養條蛇。」

田啟文	「網絡男神」鬥吹鹹竹蜂到對方口中考膽量，睇到一額汗！	鹹竹蜂

胡耀輝對於雨僑有別於人的喜好，他說：「起初同佢講呢個活動，問佢得唔得，佢話佢蛇蟲鼠蟻乜都唔驚，係驚雀，我都問佢：『你家陣係咪玩嘢呀？』我自己就真心驚嗰啲爬蟲類、冷血動物，『小強』反而唔係好驚，因為我試過放藥毒啲『小強』，3個鐘後，啲白色磚變黑晒，啲小強多到要用垃圾鏟嚟掃！『小強』都唔係好得人驚，係個場面核突啫！」

文：影視組