林超賢乘「風」逐夢
香港導演林超賢在1999年憑與陳嘉上合導電影《野獸刑警》登上香港電影金像獎導演的寶座，他往後大部分執導的電影都與「警察」有關。不過他終於在2013年成功以《激戰》來實現拍攝運動題材電影的夢想，開創香港運動電影新的一頁。去年，林導再下一城，找回《激戰》中表現突出的彭于晏，擔正開拍公路單車題材《破風》，箇中困難重重，「破風」得來不易。
起風
林導對單車的熱忱並非純屬「興趣」般簡單，雖然他不是一個專業的單車運動選手，但他亦希望透過自己在電影上的專業，將一種屬於單車的精神，以「破風」的形式向影迷表達。
我1996年就開始接觸比較專業嘅單車，其實我2000年已經想過拍單車，但當時已經覺得好難，一架單車已經唔平，加上每人嘅裝備成本好高，而且呢個題材係幾難搵到投資者，開拍最大嘅難題當然係資金啦，因為以往香港電影個形式都係做一個比較穩陣，或者係做一個有成功例子嘅，但單車我搵唔到成功嘅例子，運動片就更加搵唔到。
我最初都係踩跑山車，冇玩公路車，同埋嗰個年代都講緊五、六萬蚊一架，對我嚟講好貴，所以一路都未踩過。直至早兩、三年前，我開始接觸公路車，識咗一班公路車嘅朋友，其中有一、兩個係做單車事業，佢哋知我想拍後就大力支持我，介紹咗好多單車品牌去贊助我，呢股熱誠解決咗我好多問題，例如裝備閒閒哋都五、六千走唔甩，一架車都起碼三幾萬，公路車仲唔止。如果冇咗呢班人我好難去平衡個預算，因為我成部戲用咗四百幾架單車，係佢哋促成呢件事，所以好多嘢都係因緣際遇而做到。
承風
正因為林導的前作《激戰》開創了香港運動片成功的一頁，再加上與彭于晏的合作，令林導信心大增。而演員的質素，亦是成為《破風》的重要一寰。
其實如果冇《激戰》就可以話唔會有《破風》，因為當時《激戰》搵投資者已經好困難，喺香港亦無試過真係有運動片係成功。所以《破風》絕對可以係話繼承咗《激戰》嘅成果，亦都係因為彭于晏，因為喺《激戰》見到佢嘅毅力，老實講，如果佢唔答應我，我信心會動搖。其實當時我搵佢只不過係同佢講我有個戲想拍好耐，依家有機會，但係要好似《激戰》咁要訓練一段長時間，仲講咗個故事嘅精神畀佢聽，點知佢冇點考慮就答應咗我，其實佢真係一個活動能力幾高嘅演員，我知道佢接得一定係有放棄啲嘢。其實彭于晏為《破風》預備嘅時間好多，練習亦好早開始，佢同埋陳家樂嗰陣我哋有三個教練日日訓練佢哋，真係無得偷雞。當然仲有竇驍同崔始源。
演員喺呢套戲入面好重要，佢哋真係有能力先可以做到，唔係替身能夠取代，所以我好多時都係鋪天蓋地咁去捕捉鏡頭，我曾試過最多一次係用12部機圍住啲人嚟拍，用電單車追住呀、天台影落嚟、喺單車上面裝鏡頭，可以話攝得就攝。
轉風
電影的拍攝過程中總會遇上不少困難，而林導在《破風》中亦然，惟最令他頭痕的可謂主要演員陳家樂的重傷。
陳家樂係演員入面最「甘」嘅一個，好老實，佢畀咗好多心機，點知佢第一個鏡頭就炒，仲炒到鎖骨斷咗，其實對佢嚟講個打擊好大。當然我希望盡量安排到佢拍，但係我心底裏知道鎖骨斷咗，無半年都唔使旨意做運動，仲要係踩單車，上身個支撐好緊要，人又多，個心理壓力好大，所以我真係都打定輸數架喇，你話叫個電影停喺度等就真係冇可能嘅事，但我冇諗過佢兩個禮拜後可以爬番上架單車，當然佢唔能夠做到好複雜嘅動作，但係有個意志喺度，佢一定痛，不過佢都堅持。
我開頭唔畀佢返嚟，但後尾佢話佢得，咁我就搵咗個教練去評估，我唔信佢，我要個教練話畀我知佢得唔得，因為唔單只係佢，係成班人一齊踩，一個炒會累好多人炒，都要顧其他人安全，結果教練都撐佢。
破風
《破風》是以單車競賽運動為題材的電影，與武打片一樣需非常注重安全問題，做運動致傷並非林導希望帶出的主要訊息，反而希望觀眾有人生的另類體驗。
拍攝期間其實有好多困難，例如場景，我都要考慮到本身唔識踩單車嘅人同唔係特別鍾意單車嘅人，究竟點拍出嚟會令佢哋都鍾意單車呢？所以呢個好重要。另外就係安全問題，大家都知道單車衫，眼見幾多就得咁多，啲護具着唔到喺入面，仲要咁大班人一齊拍，好容易會有意外發生，成套戲我傷咗好多人，前後八十幾人，淨係好似陳家樂咁斷鎖骨都有七、八個。
其實喺競爭嘅世界裏面受傷都在所難免，我反而希望嗰啲未踩過嘅，話畀佢哋知單車係可以帶畀佢哋一種精神、體會，當你接觸到單車之後，你好想帶住架單車去一啲你唔會諗過會去嘅地方，有一種屬於你自己嘅呼吸呢，係好正，我自己鍾意單車都係呢樣嘢。
後記：受演員感動
林超賢今次執導《破風》後，直言希望外界視《破風》為他的代表作，雖然他執導過的每部電影都帶給他很多回憶，惟直至現在，《破風》確實是他目前最深刻的，因為整件事情從開始到現在都經歷了超多難關。而陳家樂受傷時亦令他感觸良多，令他除了欣賞彭于晏的正面態度之餘，亦體會到陳家樂作為一個演員，有負傷上陣完成使命的一種堅持。
口述：林超賢
筆錄：秦志鴻
場地：Life Cycle
化妝：Angel Y
攝影：劉斌