樂基兒練普通話玩埋真人騷
近年經濟不景氣，各行各業均受影響，模特兒界亦告遭殃，但今年宣布強勢回歸的名模樂基兒（Gaile）就依舊有價有市，早前便初試牛刀到意大利擔任旅遊節目的主持，稍後又會踩入內地做真人騷賺人仔，逆市自強！
名模樂基兒早前宣布將工作基地轉回香港，強勢回歸，雖然受到經濟不明朗影響，模特兒工作量大幅下降，但對於回流返港的Gaile並沒有造成影響，上半年她出席各大小活動，平均騷價十萬一個，短短兩三個月已穩袋百萬；下半年Gaile就主攻主持工作，她剛於上個月到意大利參與旅遊節目，首次擔任主持工作，緊接就會參演內地真人騷活動，遠赴外國拍攝，加上自家首飾品牌生意，工作排得密麻麻，荷包人氣同時暴升！
做訪問自由發揮
剛從意大利返港的她，談到首次擔任主持工作，她興奮地說：「個節目主要介紹啲名牌嘅起源同製作，仲要訪問設計師，起初都有啲擔心，因為我中文唔好，要睇稿講對白有困難，好在個節目畀我好大自由度，冇特別寫定啲對白，畀我自由發揮！」赴意國期間，Gaile亦在社交網站上載照片分享點滴。
「好有趣嘅經驗」
問到做主持跟model的分別？她說：「做model時間好正常，唔需要好長時間，但做節目等嘅時間好多，不過我覺得係好有趣嘅經驗！」此外，為應付即將開拍的內地真人騷節目，近期她積極苦練普通話，由於要拍上兩、三個月，所以Gaile又會闊別大家一陣子呢！
鳴謝：Jaquet Droz
服裝：Dorian Ho