謝賢唔搵曾江：黐線o架！
謝賢在怒摑曾江事件後，昨日他首度現身「行山」，問到有否聯絡曾江時他扯火說：「呢啲咁嘅人，仲爆嚟做乜。」而無綫節目《超強選擇1分鐘》亦有拿「怒摑」事件抽水，他坦言不介意，但提到「怒摑」事件被指是宣傳，他再發火謂：「我使唔使做呢啲呀！」
藝人謝賢於周三出席無綫節目《4個小生去旅行》記者會時怒摑藝人曾江。昨午約二時謝賢再度現身，由司機駕車從陽明山莊寓所到山頂行山。架上墨鏡、戴着耳筒的他被問到有否與曾江聯絡，他忟憎說：「黐線o架！仲聯絡佢，我冇嘢爆喇，呢啲咁嘅人，仲爆嚟做乜！」
呢世未打過交
對於有指「怒摑」是宣傳，他扯火：「我使唔使做呢啲呀！唔回應喇，梗係有人有咁嘅思想，人哋講咩冇所謂，（嬲無綫抽你水？）點會，我唔嬲人嘅，呢世人都未打過交。」
對於前新抱張栢芝粉絲開設的微博「狂數」謝氏一家，他即扯火連說三聲「唔好嘈」。問到孫仔有否陪他過生日，他說：「我唔答你呢啲嘢。（被質疑唔開心？）你邊度……喺度X咩呀你？你邊間o架？（咁你有冇探Quintus？）我冇，冇事啦應該，發燒啫，應該返咗屋企。（同孫仔視像？）有機會咪會囉。 」他又表示希望記者陪他行一個圈先走，沿途有粉絲上前與他握手和影相表示支持。
對於17日舉行的《4》首播飯局取消，謝賢說：「佢哋唔得閒。（再請台前幕後食飯？）我請幕後咋。」而《4》監製蘇敏儀表示：「幕後工作人員趕住後期，趕唔切。有打畀謝賢，佢再配合之後再食。」
拍攝前通波仔
其後謝賢再接受電話訪問，問到起行拍《4》前是否做過通波仔手術？謝賢坦言：「係呀！血管塞，咪做手術囉！（《4》第一集見有醫生幫你做身體檢查仲話你Very Good喎？）因為我要扮太空人，所以事前一定要檢查，如果我醫生喺度一定唔會畀玩，（你咪唔聽話囉？）係呀！你話我大唔大膽！（對收視有冇期望？）關我咩事！（曾江日前出嚟仲話想見你喎？）我唔識呢個人，我唔鍾意聽到呢個人嘅嘢！」
另外，前晚節目《超強選擇1分鐘》亦有拿「怒摑」事件抽水，請來當日在場的Joe Junior和主播李漫芬亮相，主持森美更發問事件真相，結果有13萬多觀眾認為是「宣傳」居多。
文：影視組
攝：追蹤組