伍允龍鍾嘉欣八年情危危乎

伍允龍與無綫花旦鍾嘉欣的八年戀情，曾一度陷入困局，日前亦傳出他箍煲成功挽救「嘉龍戀」。不過昨日他與陳展鵬、吳家樂及劉佩玥等到將軍澳電視城，參與無綫新劇《城寨英雄》的武術訓練時，伍允龍談到嘉欣竟先後兩次以「朋友」稱呼她，有別於過往在活動上稱她為「好朋友」。

無懼再碰面

被問到首次為無綫拍劇的他有否向嘉欣取經？伍允龍說：「冇，大家都有一段時間冇聯絡。（怕在電視城與嘉欣碰頭？）唔會，撞到『朋友』係唔會驚。（會否怕與嘉欣合作拍劇？）監製叫我同邊個合作我都會努力做，好似今次我同劉佩玥合作都好開心。（你同嘉欣嘅關係完結？）我哋係『朋友』。」在兩次「朋友」相稱加上斷絕聯絡的情況下，「嘉龍戀」似乎正式成過去。

鍾嘉欣與伍允龍多次傳感情亮紅燈。

吳家樂與劉佩玥練武時笑料百出。

不過伍允龍亦非常大方，提到他跟曾與鍾嘉欣傳過緋聞的陳展鵬，在劇中合作一事，允龍雖稱二人只剛認識，但亦大讚展鵬為人客氣：「相信都會合作愉快！」

展鵬怕受傷

同場的展鵬笑言不覺尷尬，直言與嘉欣的緋聞並非事實，反而最擔心會拍劇受傷，他指因《城》劇中有不少動作場面：「始終我唔係自小習武，真係千祈唔好受傷。」提到早前他被影到載着女友人一事，問到女方身份？他說：「你問番佢，同埋點解要講？都唔關個女仔事，我先係做幕前嗰個。」更希望將焦點放在傳媒工作者的安危之上，希望記者在採訪的同時亦切忌罔顧安全！

文：影視組