9個月冇收入苟芸慧出招求變
曾是無綫力捧花旦的苟芸慧因被甲狀腺問題困擾，近九個月零工作冇收入，約滿無綫的她傾續約時因「唔夠騷」，被要求賠償六位數字差額！幸好平日有積蓄的苟芸慧決定投資數十萬元轉做「點心女神」，今期《好報》便直擊她親身落舖打點，望開拓新財路！她回應此事時支吾以對，不想多談賠錢問題，但提到點心店即笑晒口：「遲啲大家就會知啦！」
2009年華姐冠軍苟芸慧年前是無綫力捧花旦之一，曾與天王郭富城及鄭嘉穎傳緋聞，高峰期騷價由三萬元升至十萬元，人氣爆燈被網友推舉為「氣質咪神」！可惜前年起受甲狀腺問題困擾，令身形如中了「不瘦降」般愈見腫脹，一度暴升至170磅，加上心情低落，工作被迫叫停，令fans擔心不已。
抹枱擺筷超熟手
據知早前苟芸慧約滿無綫，無綫以「唔夠騷」為由，要求她賠償六位數字差額，經過多次傾談後，無綫願意讓步，讓苟芸慧以放假形式延長合約直至十月中，提出多個合作方案，同時讓她認真考慮去向，六位數賠償金亦可暫時Hold住。不過，據知苟芸慧近九個月是零工作零收入，更有指有客戶指定找苟芸慧工作，但卻被無綫推卻。
然而停工休養期間，苟芸慧沒有放軟手腳，向來慳儉的她已儲落大筆積蓄，據知她早前膽粗粗一擲數十萬元，和朋友合資點心店「点心代表」，將興趣化為生財之道，希望在演藝低潮時開拓新血路，首當老闆的她對點心店非常緊張，日前更親到店舖打點。
日前傍晚時分，架上眼鏡化淡妝的苟芸慧被今期《好報》拍到現身尖沙咀某商場內的點心舖，見她清減不少，並放下女神身段，走到放滿碗碟的餐桌前又抹又執，接着Set枱擺好碗筷，非常熟手！其後她與職員研究宣傳牌擺位，又到收銀櫃翻閱帳簿，期間有食客要求服務，苟芸慧即上前親自招呼，雖然被不少食客認出，但她明顯見慣不怪，繼續親民笑晒口！據知店舖還在試業階段，苟芸慧不時微服出巡，無論樓面以至管理工作都一腳踢，希望由「螢幕女神」轉型做「點心女神」，決心十足！
學中文賽車消閒
對於被指欠騷要賠錢給無綫，以及九個月零工作冇收入一事，苟芸慧接受電話訪問時支吾以對：「呢一方面唔想講太多喇！但公司都好錫我。（咁你係咪投資咗幾十萬開點心舖？）哈哈！遲啲大家就會知啦！依家保持神秘。」問到放長假如何打發時間？她笑住說：「周圍搵嘢學，好似中文，賽車就啱啱考咗個牌，好開心，同埋有學烹飪囉！」
文：影視組