Mr.內訌吵大鑊惹拆夥疑雲
樂隊Mr.「散Band」？事緣結他手MJ在社交網上以「我不快樂」為題撰千字文，當中提及2年前，因參與涉政治爭論的音樂騷，令樂隊成眾矢之的；又提及樂隊成員曾「吵大鑊」險動粗，有成員發晦氣話「完結樂隊」。貼文一出，嚇得Fans驚叫Mr.冷靜。
由Alan、Dash、MJ、Ronny及Tom組成的樂隊Mr.，昨日傳出避不過「7年之癢」，待明年跟唱片公司約滿後拆夥，有此揣測，全因MJ在Facebook寫了「我不快樂」為題的文章。內容講及2013年7月，在唱片公司安排下，樂隊參加了一個被指有政治色彩的音樂騷，自此受到無盡指摘，隊員慘被「撕得四分五裂」；同年12月，其中兩名成員吵架險些動手，其中一名成員更聲言「完結這隊樂隊」。此文一出，即有fans勸他們冷靜下來。
音樂上有分歧
MJ在電話中指外界太敏感，其文章只是因創作一首歌曲而有所感觸，雖認Mr.的確有拗撬，但早已冰釋前嫌：「我哋依家好開心。（你同其他成員互轟？）我係勸交嗰個喎！（差啲打交？）冇打。（係咪因為個音樂騷而嘈？）係兩回事，我話我哋係被外人鬧到『四分五裂』，我哋嗌交係為音樂上分歧，完全唔關個音樂騷事。」
環球斟洽續約
而Dash接受電話訪問時稱MJ是「傷春悲秋」的感性人，問是否MJ口中的鬧交成員？他說：「唔好講邊個啦，五個都有份。」問他可想過拆夥？他直言：「有人私下傾過個人發展，但冇實際行動。」而唱片公司則回應：「環球當然會同Mr.續約，依家傾緊，進展非常順利。」
文：音樂組