田蕊妮未夠牙力生B拗輸
無綫劇集《鬼同你OT》近日掀起全城熱話，女主角田蕊妮搞怪演技深受喜愛！她直言與陳豪的「視帝視后配」及與胡定欣的合作感覺新鮮。提到陳豪已是兩子之父，阿田即謂生B是理性與感性的對話：「依家感性都仲未拗得贏！」她亦坦言遇上《巨輪》中的「倀雞英」很感恩，亦高興能在《巨輪2》與「倀雞英」再續前緣！
《鬼同你OT》近期熱播，田蕊妮的生鬼演技大獲好評。她坦言首次與陳豪及胡定欣合作令觀眾有新鮮感：「有鬼又有黑色幽默嘅題材，針對輕鬆搞笑，已經好耐冇人拍過！」她更大讚陳豪：「佢完全冇小生包袱，唔會嫌騎呢，直頭放開晒。睇劇本時已覺得好得意，有好多超現實元素。未被鬼上身時，我就用一個好似宿醉嘅狀態嚟做，一上咗身就變成所有嘢好清晰，令兩個角色有好鮮明嘅演繹，對我嚟講都好大膽！」
同劇的陳豪已是兩子之父，問到阿田會否心郁想生B，她深思一會後謂：「生B一直都係理性與感性嘅對話，有時見到姪仔咁得意會好想生，但理性咁諗佢大個又要搵學校又要擔心佢讀書識朋友，養兒一百歲長憂九十九，所以依家感性都仲未拗得贏理性。當感性拗得贏嗰陣，我又要拗得贏我身邊嗰個人，生仔唔可以靠自己（口架）嘛！」
「倀雞英」令人亢奮
將於《巨輪2》再做「倀雞英」的阿田，坦言上集令她得到很多：「有獎項嘅鼓勵，有觀眾嘅認同，演嘅過程好享受。知道拍第2輯時其實有擔心，覺得要拍嘅嘢都拍晒，但一接到劇本，上集嘅畫面返晒嚟，好似曾經用倀雞英個身份活咗幾十年咁，佢喺我身體入面紮咗根！當我feel到倀雞英返嚟嗰陣真係好開心，呢個世界上冇人開心得過倀雞英，佢鍾意講咩就講咩，你激嬲佢，佢鍾意鬧你就鬧你，拍劇遇着呢啲角色好正，個人好亢奮又positive！」
入行22年初哥變擔正
入行22年，當中阿田亦遇上幾個重大的角色轉捩點：「第一個係《縱橫四海》嘅阿Cat，令我由完全對演戲冇興趣到覺得自己天生係演員！第二個係我入咗嚟無綫喺《宮心計》客串頭3集，梅小青監製搵我嗰時我覺得冇所謂，當然主角係套劇嘅重心，但側邊啲齒輪唔轉嘅話就冇用，而且故事好吸引！第三個係兩年前嘅《誰家灶頭無煙火》，我開始唔會對個劇本睇到咁死，只要捉緊角色性格就得，亦訓練出自己嘅節奏，跟住就梗係『倀雞英』喇！」
文：專案組
攝：黎志輝