林敏驄涉侵權急收埋MV
林敏驄近日惡搞陳奕迅及露雲娜的合唱歌，重新炮製重口味的《屎男屎女》，不過阿驄今次搞「屎」棍搞出禍，事關他用原版《講男講女》的MV片段進行二次創作。不過平時愛認屎認屁的他得知惹來侵犯版權之嫌，即「淆底」列作私人影片，認真又要威又要戴頭盔！
歌神陳奕迅（Eason）與露雲娜五年前推出合唱歌《講男講女》，最新被音樂鬼才林敏驄重新填詞，推出惡搞版《屎男屎女》大講「便便經」。恨做男主角的阿驄親自演繹男聲，女聲則由「露蓮娜」獻唱，不少網民推測這位神秘女聲是官恩娜或原唱者露雲娜，殊不知原來是龍小菌。
「唔玩佢哋先嬲」
雖然阿驄今次的二次創作相當花心思，親自上陣拍攝《屎》MV，更加入了不少大便照片，不過MV中剪輯了原版《講》Eason及露雲娜的片段，涉侵犯版權。阿驄昨日與黃日華、衞志豪練波後接受本報電話訪問，問可會擔心惡搞版本激嬲兩位原唱？他初時仍寸寸貢：「唔怕，唔玩佢哋先嬲，我玩吓啫。」
提到《講》MV版權屬於Eason所屬的環球唱片，阿驄繼續寸嘴：「環球咩嚟？凍肉公司？二次創作玩吓啫，應該冇問題，我同環球好朋友嚟。佢哋詐型咪剷咗佢囉，二次創作成日係咁口架啦！」可是在環球未有表態追究前，阿驄自行「河蟹」，將《屎》MV列為「私人影片」不作公開播放。再致電問他為何「私密」MV？他罕有「淆底」地說：「我怕被人告嘛，暫時唔會公開個MV。」
環球已交法律部
環球唱片唱片總經理譚先生表示已將事件交由法律部處理，暫未有任何行動，但強調與阿驄分屬老友。龍小菌經理人邵子風則稱：「其實對歌曲有宣傳作用，只要大家唔當商業用途，相信唱片公司唔會咁認真採取法律行動。」身在上海的小菌指非常滿意製成品，更期待與阿驄再合作。
另外，Eason昨日在北京舉行新碟記者會，獲唱片公司高層送上金哨子，預祝新碟大賣！
文：音樂組