謝賢遭唱衰：我都要搵律師
謝賢最近傳與其司機不歡而散，謝賢更遭對方唱衰，並涉人工數目糾紛，有指司機欲向勞工處投訴。謝賢昨日坦承上周五（17日）辭去司機，薪金則支付至上周四（16日），對於司機向勞工處投訴，他說：「如果勞工處話我唔啱，到時我咪畀番錢佢囉，但我一定會搵律師爭取番我嘅權益！」
他續指該司機經常請假，聲稱要照顧妻兒及母親，故也批准對方放假回家，惟司機要求愈來愈過分：「佢話個女周六要見校長、媽咪生日要請假，我都畀，但冇理由無啦啦要返屋企食飯囉。其實我好少用車，都係畀個女用多，但佢一陣又話牙痛要睇醫生。」
謝賢又無奈地稱，早前司機撞爛其七人座駕，逾十萬元的修理費也未有追究：「我好錫佢(口架)，但對佢好都冇用，真係激死！」並謂不介意對方周圍唱衰，相信清者自清：「我唔嬲，知道佢鍾意講嘢，但我係公眾人物都唔好周圍亂講，頂佢唔順呀，唔想見佢！」