溫家偉唔忘本甜言冧無綫
「大隻仔」溫家偉（Alan）坦言想開一間屬於自己的甜品店已久，夢想終於成真，投資7位數字的雪糕三文治店「Stacks Ice Cream（層層疊）」將於明天開張，他更笑言自己已變成窮光蛋！除了雪糕店，他在工作上亦有新發展，跟隨經理人簽約新電影公司的他，仍為無綫大派定心丸：「冇無綫就冇大隻仔！」
今次Alan豪擲7位數字為自己圓夢，至上星期本報落舖視察時，招牌仍未裝上，他坦言各方面都非常趕：「連另一邊牆都未封，雪糕機、櫃亦全部未到，不過最重要嘅雪糕同曲奇餅都已經整好晒，招牌亦design好！」
「Stacks Ice Cream（層層疊）」的招牌菜正正是兩塊曲奇夾雪糕，Alan會每月為客人帶來新意：「暫定每個月6款口味，頭一個月有basic嘅綠茶味，但都唔係普通綠茶味，我調校成有清新花香嘅綠茶，亦有雲呢拿同曲奇味。特別味就有煙肉味、香蕉dark rum味同埋荔枝雪芭！」
想三個月後開分店
他承認睇舖是最大困難，更揚言想在3至4個月內開第2間分店：「揀舖揀咗好耐，租金唔係首要條件，最重要係location。開頭睇咗好多間，本身諗住5月尾6月頭就開，正諗住落筆簽就畀其他人租咗甚至成間舖賣咗！我依家真係好窮，器材、裝修各樣嘢加加埋埋都7位數字，冇嘢好講，哈哈哈哈！真係好心痛！想3至4個月內開第2間分店，香港未試過有呢樣嘢，我本身學過做雪糕廚，呢啲雪糕可能真係要去到酒店先食到，而我係想大家開心咁食，唔使用咁貴價錢先食到，定價就三十幾蚊basic兩塊曲奇加雪糕。」
「冇TVB冇大隻仔」
而上周Alan收到《巨輪2》劇組通知，他將隨隊到澳門出外景，他笑言：「順便賣吓雪糕啦！都想喺澳門甚至亞洲帶起雪糕三文治呢個潮流。第2間想喺中環、尖沙咀、灣仔或者銅鑼灣，真係會keep住窮！」剛隨經理人簽約新電影公司「幕後人製作有限公司」，在工作上都有新嘗試：「依家拍緊陳嘉上監製嘅《潛龍狙擊》，會有好多動作同槍戰。不過無綫對我嚟講一定係第一位，冇佢就冇大隻仔！依家有機會畀我同時行兩條路，正呀！」
文：陳丹
攝：樊愛慈