秋生得罪人多君如食硬白果

影帝黃秋生演舞台劇功力深厚，八月初公演的新劇《狂揪夫妻》更找來影后吳君如助陣，令人期待！劇中秋生與君如飾演一對夫妻，因雙方的小朋友吵鬧打架，令他們與另一對夫婦潘燦良及甄詠蓓交惡，四人遂揭開內心的陰暗面！

練體能添難度

秋生笑言首次演舞台劇的君如非常難湊，惟有自己「啃咗佢」飾演其丈夫，君如表示角色情緒起伏大，兼有不少動作場面：「我飲醉酒，跟住同秋生嗌交打交，兩Pair夫妻累積多年不滿，然後對住陌生人揚晒出嚟。第一次演舞台劇仲要打埋，係加添難度，不過如果冇挑戰做嚟做咩？我會努力克服佢！」

君如表示每日都在學習階段，感覺與拍電影截然不同：「我仲係摸摸吓，好多地方唔明我會照問，唔怕面懵，最難就係記劇本，每人都有一版紙直落，之後仲要訓練體能，要食多啲嘢增加能量。」秋生大讚君如悟性高，卻叮囑她「好自為之」：「最難嘅嘢未排到呀！之後你就知味道！」問到演慣喜劇的君如屆時會否爆肚？君如即認真地說：「我哋唔係鬧劇式，對白節奏要好精準，唔係嘻嘻哈哈，笑完就算，唔係好似EYT咁。」

跟女兒學做戲

君如透露最近忙於排戲，日間跟甄詠蓓學藝，回家後女兒陳是知竟變成其師傅！她笑說：「阿女喺學校學做戲，返嚟教埋我添！教我點放鬆，點練聲，佢把聲好好聽又好記性呀！反而我開始冇晒呢啲嘢，倒退緊，見到佢好似見番以前自己，群吓佢都幾好呀！」

提到劉嘉玲早前踩入舞台劇界即奪劇后，君如讚對方演出精湛，但自覺兩人難以比較：「大家角色、劇種、年代都唔同，而且做戲唔係為獎項。」秋生則搞笑睇死君如冇獎：「佢一定冇！我哋劇團冇獎0架，我得罪人多呀！我寧願拎現金獎，同埋觀眾欣賞，而且畀獎你嗰個又未必識嘅時候，自己畀自己都一樣啦！」

on:黃秋生

化妝：Jolinn Ng

髮型：Jeff Wu

服裝：Agnès b

on:吳君如

化妝：Midco Chu

髮型：Seiko Sin＠Hip Hair Culture

服裝：3.1 Philip Lim　

鞋：Jimmy Choo

文：立影

攝：吳文聰

場地：Emax