葉翠翠尷尬被逐離庭

葉翠翠上周六才與圈外男友周曉東（Raymond）共諧連理，昨日便與老公到灣仔法院，就Raymond與前妻Grace Lam贍養費問題到家事法庭出席聆訊。昨早約9時，翠翠與老公乘坐由司機駕駛的七人車到達法院，兩人落車後全程十指緊扣，任影唔嬲。被問對官司有否信心？翠翠答：「一陣出嚟話你聽。」之後雙雙步入灣仔政府大樓。

「我有啲尷尬」

由於案件屬內庭聆訊，記者只能在庭外守候，翠翠則與老公進入法庭休息室等候開庭。約40分鐘後，翠翠單獨走到電梯大堂，記者問為何只得她出現？她說：「我同老公係直屬關係，本應可以入法庭，但對方律師通知唔可以，所以我冇得入。」她稍坐一會後返回休息室。

上周才結婚的翠翠與周曉東便要面對問題。	兩人由進入法院至離開亦是十指緊扣。	翠翠上七人車離開時不忘向記者揮手道別。

直至10時半左右，翠翠與老公十指緊扣離開法院，大批記者上前採訪，對於官司結果，翠翠表示：「未知，因為我有啲尷尬，對方反對我入法庭。（第一次見老公前妻？）見唔到，對方喺另一個出口走咗。」

「冇揀錯老公」

記者轉問Raymond對官司有何看法？他沉默不語。再問他對於前妻一方拒絕翠翠進入法庭時，拖實翠翠的他仍是搖頭拒答，翠翠見狀即說：「佢好緊張，都係我答啦。呢件事冇影響到我哋，我感覺就好似平時會落雨，依家就似打風，但我哋會握實對方隻手，話畀對方知唔使驚，我哋一齊去面對。呢件事令我覺得，呢個老公我冇揀錯！」說罷即在記者面前舉起與老公緊握的手，大玩「show hand」。

翠翠續稱：「我都知老公之前為我受咗好大壓力，又病，要針灸。（煲番湯水佢補番？）我唔識煲湯，sorry！下次上庭係9月，但我、我先生同律師嗰日都唔得。（官司令度蜜月一再延期？）旅行幾時都有得去，希望完咗件事先。（下次都陪老公出庭？）係，最多喺房仔等。」說時面上掛着幸福笑容，兩人之後登上七人車，翠翠臨關門前還向記者揮手講拜拜。

文：影視組