周嘉儀未遇Mr. Right 被阿媽放棄

現年32歲的前無綫新聞小花周嘉儀（Venus），於2003年加入無綫新聞部任實習記者，2005年火速上位成為大台重點欄目「鐵腳」主播，至今年離職轉投金融投資行業，期間傳出不少緋聞，是非傳個不停！她先在2013年被指跟年紀大自己18年的已婚無綫主播許方輝撻着，鬧出第三者風波，一度揹上破壞別人婚姻之名，延至今年初，仍傳出有關此風波的電話滋擾事件。其後，她除在去年被發現與一名手戴婚戒的中年男人同遊商場外，今年5月初又被拍得與一名家住西貢獨立屋的有米筍盤Edward到中環撐枱腳歎日本菜，據知因男方同是從事金融投資行業，故二人特別投契；繼而在6月下旬被拍得與一位「KY」先生密密互傳短訊，發生手機洩「蜜」事件，緋聞確是一波未平一波又起！

只要問心無愧

針對個人近來出現較多有關感情的負面緋聞，早前轉投新工作的Venus，感恩表示幸好現任公司十分體諒自己的狀況，她笑說：「公司到目前為止都好支持自己，我好多謝公司上下咁信任同諒解，我亦都好想大家可以集中番喺我嘅工作上，（有冇諗過點解有呢啲新聞出現？）我唔想深究呢個問題，亦研究唔到，得唔到答案，我都覺得好莫名其妙，不過我覺得做好自己本分，清者自清，其他無謂嘅事唔想理，（怕唔怕影響你之後搵真命天子？）控制唔到嘅嘢唔諗咁多，最緊要問心無愧。」

已到適婚年齡的她續透露家人沒有向自己催婚：「佢哋都明白感情事難勉強，要順其自然，所以媽咪都半放棄狀態，知道畀壓力我都冇用。」她坦言自己雖擁有極強工作奮鬥心，但絕對不是女強人，家庭永遠是心中的第一位，隨後笑稱：「當Mr. Right出現，就唔會排除任何可能性，但目前為止都未見嗰個人出現，（咩人可吸引你？）主要睇夾唔夾、有冇相近價值觀，如果孝順就必定會加分。」

剖析離職因由

現時在證券行任職的Venus透露早前決意轉換工作，全因自己喜歡挑戰，不希望長期停留在同一個環境裏：「唔想喺一個環境入面十年八年咁流水作業，我希望個人可以再進步，所以先唔畀自己停留喺一個安全區，會不進則退o架，趁仲有機會，想睇睇出面個世界係點，睇吓自己適唔適合呢個工作。」自言對投資有少許研究的她表示早前已跟胞姊一起買樓，齊齊做業主：「除咗買少少股票同基金外，我覺得買樓最保值，依家同家姐供緊一層，希望努力啲做嘢，將來有機會買第二層。」

她笑言現時恍如重回半工讀的時期，工作之餘，還需上堂考取證券牌。現專注工作的Venus坦言自己並不是他人眼中極具計劃之人，並不會想及三、五年後的事，她說：「因為你唔知機會幾時出現，所以我唔係好想對事情有planning，我覺得只要任何時候都裝備好自己，咁啲機會就自然會嚟，到時只要好好發揮就得。」

採訪：車綺敏

攝影：吳文聰

化妝：Carriemok@MakeUp Plus

首飾：Just Gold鎮金店

服裝：twist

場地：E-Max