黎美言苦練絕技 瘀到爆

組合HotCha前成員黎美言（Winkie）最近密密為正式進軍影視圈積極裝備自己，望成為歌影視三棲藝人。問她如何裝備自己？她表示自己煲盡經典電影希望習得高手一招半式，更指自己是電影迷：「細個已經好鍾意同爸爸一齊睇錄影帶，大個咗又同中學同學成日去睇電影，公司就覺得除咗唱歌跳舞外，都可以試吓拍電影。」

喜歡郁手郁腳

Winkie更透露曾拜金像影帝黃秋生為師，下課後亦自己對鏡練習，認真畀心機。而試過在戲中客串的她就坦言恨做打女，喜歡郁手郁腳，問她是否打得之人？她笑謂：「我身邊嘅朋友都覺得我好大力，通常我同人哋say hi會拍人膊頭，佢哋都會感受到我大力。」又透露自己食過夜粥：「我都真係比較暴力嘅，之前試過同人玩MMA（綜合格鬥）鎖住人哋，但成日搞到自己周身瘀，所以一屋都係去瘀膏。」

Winkie積極備戰進軍影視圈。

Winkie直言恨做打女。

偶像君如毛毛

同樣是HotCha出身的戰友張惠雅（Regen）現在亦主力在影視圈發展，Winkie指自己和Regen各具特色，更笑謂：「佢可以做到啲好細個嘅角色，因為佢個樣真係好baby face，我最多都係做到中學生。」而視吳君如和毛舜筠（毛毛）為偶像的她，直言她們是自己仿傚對象，是高手中的高手：「之前有機會同佢哋同場，雖然冇對手戲，但我就喺後面睇，覺得佢哋好犀利，記劇本又快，仲有種幽默感喺佢哋身上。」

文：影視組

髮型及化妝：Chris Lam

服裝：SCHIESSER

場地：2/3 Dolci