最愛是誰？

張紋嘉：「我最愛係嫲嫲，細個已經照顧我，因為父母要外出工作，佢好錫我，喺我長大時畀咗好多愛我，可惜佢早過身，冇機會喺大個後回饋佢，我相信前世今生，希望下世再遇嫲嫲，一定會用好多愛去報答佢。」

湯怡：「最愛係我Daddy媽咪，之前母親節我特登打咗段訊息畀我媽咪，諗起自己會對家人發脾氣，但佢依然每日煲湯我飲，當我係小朋友，打打吓感觸到喊咗出嚟，好感受到媽媽嘅愛，依家係時候回報番佢。」

湯怡	名模琦琦	歌手鍾舒祺

名模琦琦：「我心目中嘅最愛就係我囡囡，我要多謝佢令我變得更快樂，好記得佢第一次參加朗誦比賽，心情特別緊張，我同佢講贏輸都唔緊要，媽咪永遠都愛你，而佢比賽最後得到第一名，企喺台上面望住我笑，真係好感恩，因為有佢嘅出現！」

歌手鍾舒祺：「我最愛就係我家姐鍾舒漫，佢對我同父母差唔多，煮早餐、晚餐我食，有時仲要照顧我叫我去沖涼，又要執我房周圍擺嘅衫！佢依家就好似身為人母咁，擔心個女嘅心情，有咁好嘅家姐真係要好多謝佢！」

鄭欣宜：「我最愛係婆婆邱淡素（已故），佢係一個好矮得四呎幾吋高，又係紮腳嘅一個老人家，但佢係可以轉眼間一個人，煮出九餸一湯畀好多人食嘅『能幹婆（上海話）』呢！」