張家輝孤枕獨眠 搵學友解悶
張家輝昨日出席運動品牌活動親教籃球學員操體能，卻笑學員似「揸大炮」攻打伊拉克。訪問時認加片酬的他，自爆老婆關詠荷拉埋囡囡賣甩自己到美國玩，更指女方心狠手辣冇血性，惟有間中搵「阿哥」張學友解悶。
影帝張家輝昨以代言人身份到中環adidas運動基地，指導四位adidas街頭籃球學院學員使用體能訓練器材ViPR。期間家輝見到一位學員姿勢似「揸大炮」，就笑問對方是否要攻打伊拉克？更謂：「你好似流流o地喎依吓？」
訪問時，正拍攝電影《賭城風雲3》的家輝透露首次參與如此龐大製作的電影：「包o左香港好多廠景去陳設，呢個模式似報道裏面o既荷里活用得多o的。」更指拍廠景夠舒服：「你o地探班就知幾咁疏肝！（片酬有加？）就有o既。（2,000萬？）商業秘密唔講啦，係投資方得到好成績對我o既表示啫！」又表示劇組應該在10月完成所有拍攝。
冇大志難去荷里活
問是否少了時間陪老婆關詠荷及囡囡？家輝就表示兩人賣甩自己到美國旅遊：「收o左工返到屋企靜英英，o的工人又訓晒覺，好孤單咁囉！我對住我老婆講：『心狠手辣呀你，冇血性呀你，小心你收尾o個幾年！』」但指自己其實不喜歡旅遊：「東南亞還好，有中國o野食吓，但去到歐洲三日後就算間唐餐幾難食都要去扒碗飯，即住就即刻想走。」更表示留在香港最好：「死啦，冇大志，去唔到荷里活！」講到解悶，問他會否找朋友上自己屋企玩？他就指自己少朋友：「有陣時都會同『阿哥』（張學友）傾吓電話o既，但多數都自己一個人。」
文：影視組