陳豪谷劇任玩射多個女

田蕊妮、陳豪、胡定欣、楊秀惠等一眾藝人為新劇《鬼同你OT》，昨日到太古玩射箭遊戲宣傳谷劇，阿田大講有味笑話說：「阿Mo（陳豪）射嘢最勁，生咗兩個嘞，腳部肌肉幾穩陣，一射即中，下一個就生女喇！嘩，佢射到板都歪埋，咁多個得佢射得穿咋！」合照時又將陳豪腹部的箭朝向下，相當多手。

BB轉身好cute

陳豪為谷劇被玩都冇所謂，他說：「接《武則天》播都有壓力。（想有幾點收視？）依家新世代唔可以作準，以前收視條線要拉低，但宣傳撞正掛八號風球係好兆頭，我都要返去做防風措施。（掛住對仔？）啲仔臨瞓前望過吓，見BB轉身，so cute。」

胡定欣（左二）、田蕊妮齊齊中箭。

楊秀惠追住陳豪嚟射。

至於阿田笑言很多人都想摑她：「個劇宣傳片出街後，好多朋友好期待，話我個樣好抵打，好想摑我，我拍時都想自摑，個角色啲面口太樣衰，定欣都想摑我。（老公杜汶澤都摑得你唔少？）梗唔係，我喺屋企係賢妻嚟！佢話喺馬來西亞趕返香港睇我個劇，我擔心打風可能會影響航班。」

定欣「冇仔生」

定欣被溫家偉用箭射中背脊，她說：「就嚟冇仔生！（好心急生仔？）女仔梗係咁講啦，我留番畀啲好姊妹做媽媽先，我唔好搶閘住。（新劇接《武則天》播有壓力？）都係好壓力，希望承接到佢嘅好成績。」

文：影視組