高海寧濕身 誘陳智燊談心
宅男女神高海寧日前穿吊帶裙加四吋高踭鞋於中環拍攝一場淋雨戲，女神冒雨狂奔，條裙濕到貼晒身都毫無怨言，見她稍為抹一抹面，又繼續和陳智燊拍車內戲，相當專業。
高海寧（高Ling）於新劇《愛情食物鍊》不時以街市賣魚妹造型示人，不過，女神級的她於戲中亦有靚靚現身的時候，日前高Ling便換上雪紡吊帶連身短裙，腳踏四吋高踭鞋，大騷長腿重現女神姿態埋位拍攝。
認真睇劇本
當晚凌晨12點多，高Ling聯同陳智燊（Jason）於中環等開工，未正式埋鏡時，高Ling認真地站在街燈下看劇本，間中又識做地和工作人員傾偈，氹到各人十分開心。
未幾劇組安排她拍攝一場落雨戲份，經數次試位後，人造雨車即時灑水，眼見高Ling拿着個小小的手袋遮雨，繼而狀甚狼狽地冒雨狂奔，濕晒身之際高Ling身上的裙子更見貼身，黐晒大髀，盡現誘人曲線。
來回跑數次
高Ling來回跑了數次便成功拍完淋雨戲，只見她懶理濕透，稍為抹一抹面，便登上私家車，與Jason拍攝另一場談心戲份，人靚身材好兼且捱得，怪不得高Ling拍完一部又一部劇集，成為電視台愛將。
文、攝：追蹤組